Nýjasta kvikmynd Mika Kaurismäki um Grump, sem nefnist Fimmtudagurinn langi, verður frumsýnd í Smárabíói fimmtudaginn 27. mars kl. 19 að leikstjóranum viðstöddum. „Myndirnar um hinn aldna skógarbónda Grump hafa notið mikilla vinsælda hér á landi og í upprunalandinu, Finnlandi. Bækurnar eru gerðar eftir metsölubókum Tuomas Kyrö. Í nýjustu myndinni verður Grump, sjálfum sér til mikillar undrunar, ástfanginn af listakonunni Saimi. Synir Grumps eru ekki jafn ánægðir. Þeir vilja koma föður sínum á hjúkrunarheimili, en Grump er með önnur áform,“ segir í viðburðarkynningu.
Sjálfur segir leikstjórinn um myndina: „Ég vildi segja frá ástum eldri karls og konu á hlýjan og einfaldan hátt, án nokkurs konar væmni. Það var nautn að vinna með frábærum leikurum sem tekið höfðu hlutverkið inn á sig í minnstu smáatriðum. Við gerð Fimmtudagsins langa gekk allt upp hjá mér.“
„Finnski leikstjórinn Mika Kaurismäki markaði tímamót í finnskri kvikmyndagerð með fyrstu mynd sinni í fullri lengd Hinir einskisverðu (1982). Hann hefur um áratugaskeið verið þekktur fyrir fjölbreyttar myndir og hingað til lokið við 40 myndir. Hann hefur leikstýrt þekktum myndum eins og Meistari Cheng (2019), Los Angeles án landakorts (1998), Uppvakningurinn og draugalestin (1991), þar sem glöggt kemur fram hve fjölhæfur hann er og mikill sögumaður. Myndir eftir hann fjalla oft um mannleg samskipti, árekstur menningarheima og kyndugan hvunndagsleikann með sérstöku sjónrænu lagi og lunkinni kímnigáfu. Fyrir utan leiknar myndir hefur Mika Kaurismäki líka leikstýrt þó nokkrum heimildarmyndum,“ segir í kynningu. Þar kemur fram að hann hafi tvisvar unnið til verðlauna á Berlínarhátíðinni fyrir heimildarmyndir sínar.
Til baka
Leita í greinasafni
Prenta grein