Daði Kristjánsson, stofnandi og framkvæmdastjóri Visku Digital Assets.
Daði Kristjánsson, stofnandi og framkvæmdastjóri Visku Digital Assets. — Morgunblaðið/Hallur Már
Rafmyntageirinn, efnahagsstefna Donalds Trumps og skuldasöfnun ríkja er til umræðu í viðskiptahluta Dagmála þessa vikuna. Gestur þáttarins er Daði Kristjánsson, stofnandi og framkvæmdastjóri Visku Digital Assets

Rafmyntageirinn, efnahagsstefna Donalds Trumps og skuldasöfnun ríkja er til umræðu í viðskiptahluta Dagmála þessa vikuna. Gestur þáttarins er Daði Kristjánsson, stofnandi og framkvæmdastjóri Visku Digital Assets.

„Ég skora á Ásgeir og hans fólk í Seðlabankanum að skoða rafmyntageirann af því að þessi heimur er að breytast hratt,“ segir Daði og bætir við að það sé einfaldlega þannig að margir seðlabankar í Evrópu séu farnir að gefa geiranum gaum og sá bandaríski einnig.

„Þetta er orðið eitthvað sem er eðlilegur hluti af eignasafni. Við erum ekkert að segja að þetta eigi að vera eina eignin í eignasafninu. En líkt og BlackRock segir, þetta er góður hluti af eignasafninu sem hjálpar við að dreifa eignum,“ segir Daði.

Hann bætir við að Seðlabanki Íslands eigi gull og liggi á um 22 milljörðum af gulli.

„Síðast þegar ég vissi þá var það geymt í Englandi. Og England eða þessi svokallaða vinaþjóð setti á okkur hryðjuverkalög fyrir ekki svo löngu síðan. Ég velti því fyrir mér hvort þessi óháða eign okkar hafi raunverulega verið undir okkar yfirráðum á þeim tímapunkti. Með Bitcoin er ekkert mál að eiga þessa eign og hafa hana undir sínum yfirráðum. Algjörlega óháð öllum öðrum. Það er einn af kostum þessarar eignar. Þannig að ég held að þetta sé eitthvað sem ætti að skoða meira og taka meiri umræðu um,“ segir Daði.

Verður mjög sársaukafullt að rétta skuldastöðuna af

Talið berst að efnahagsstefnu Trumps sem felur meðal annars í sér viðleitni til að bæta skuldastöðu Bandaríkjanna.

„Kerfið sem við búum við er með þannig hvata að ég á erfitt með að sjá stjórnmálamenn taka mjög erfiðar ákvarðanir til lengri tíma af því að það er bara orðin svo mikil skuldasöfnun. Það er mjög erfitt að keyra kerfið niður,“ segir Daði og bætir við að ef horft sé á Bandaríkin hafi þau skuldað minna en 10 trilljón dollara við fjármálahrunið 2008.

„Skuldirnar eru nú komnar yfir 36 trilljón dollara. Þær eru næstum búnar að fjórfaldast. Og sem hlutfall af landsframleiðslu eru þær búnar að meira en tvöfaldast, fara úr 60% af landsframleiðslu í um 120% af landsframleiðslu. Þannig að þetta er gríðarlega ósjálfbær vegferð,“ segir Daði og bætir við að mikilvægt sé að snúa þessu við.

„Það sem mun þurfa er alveg gríðarlega öguð ríkisfjármál til lengri tíma og það er mjög sársaukafullt og verður mjög þungt fyrir markaði.“