Greinargerðir verði gagnorðar

Stjórn dómstólasýslunnar hefur samþykkt nýjar leiðbeinandi reglur um hámarkslengd stefnu og greinargerða í einkamálum o.fl. Reglurnar öðlast gildi 1. maí næstkomandi.

Markmiðið með setningu reglnanna er að stuðla að því að stefnur og greinargerðir í dómsmálum á öllum dómstigum séu hnitmiðaðar, gagnorðar og skýrar en ekki of langar og auka þannig skilvirkni við meðferð dómsmála, að því er fram kemur í tilkynningu á heimasíðu dómstólasýslunnar.

Þar kemur fram að reglurnar mæli fyrir um að lýsing málsatvika, málsástæðna og lagaraka í stefnu til héraðsdóms skuli ekki vera lengri en sakarefni og umfang máls gefa tilefni til.

Lýsingin skuli vera hnitmiðuð og gagnorð og að jafnaði ekki lengri en 3.500 orð (þ.e. um 8 blaðsíður). Sama hámarkslengd á við um greinargerð fyrir héraðsdómi en umfjöllun um formhlið máls samhliða efnisvörnum getur þó réttlætt lengri greinargerð.

Í sérstaklega flóknum eða sérstaklega umfangsmiklum málum getur lýsing málsatvika, málsástæðna og lagaraka í stefnu og greinargerð fyrir héraðsdómi verið allt að 7.500 orð (þ.e. um 18 blaðsíður) eða í algjörum undantekningartilvikum allt að 10.000 orð (þ.e. um 24 blaðsíður).

Sömu viðmið eiga við um greinargerðir aðila fyrir Landsrétti og Hæstarétti.

Stjórn dómstólasýslunnar skipa: Sigurður Tómas Magnússon hæstaréttardómari, formaður, Jón Höskuldsson landsréttardómari, Lilja Björk Sigurjónsdóttir gæðastjóri, Arnaldur Hjartarson héraðsdómari og Lúðvík Örn Steinarsson lögmaður.