Ingibjörg mamma mín fæddist í Reykjavík 28. mars 1925. Foreldrar hennar voru Gunnar Ólafsson, bifreiðarstjóri næturlækna, og Ragnheiður Bogadóttir frá Búðardal.

Foreldrar Gunnars voru Ólafur Ásbjarnarson frá Innri-Njarðvík og Vigdís Ketilsdóttir frá Kotvogi í Höfnum. Ólafur var sonur Ásbjarnar Ólafssonar í Njarðvík og Ingveldar Jafetsdóttur, Einarssonar borgara Jónssonar prests á Hrafnseyri við Arnarfjörð. Jafet Einarsson og Jón forseti voru bræðrasynir. Þau Ásbjörn létu reisa Njarðvíkurkirkju fyrir eigin reikning. Vigdís var dóttir Ketils Ketilssonar og Vilborgar ljósmóður Eiríksdóttur, Ólafssonar á Litla-Landi í Ölfusi. Ketill og Vilborg létu reisa Hvalsneskirkju og greiddu kostnaðinn.

Ragnheiður var dóttir Boga kaupmanns Sigurðssonar í Búðardal og fyrri konu hans, Ragnheiðar Sigurðardóttur Johnsen frá Flatey. Bogi var sonur Sigurðar Finnbogasonar á Sæunnarstöðum í Hallárdal og Elísabetar Björnsdóttur á Þverá í Hallárdal, Þorlákssonar.

Foreldrar Ragnheiðar Sigurðardóttur Johnsen voru Sigurður kaupmaður Johnsen í Flatey og Sigríður Brynjólfsdóttir, Bogasonar kaupmanns í Flatey Benediktsen og Halldóru Sigurðardóttur en faðir Brynjólfs var Bogi Benediktsson á Staðarfelli, höfundur Sýslumannaæva. Föðurafi og –amma Boga á Staðarfelli voru Bogi Benediktsson í Hrappsey og Þrúður Bjarnadóttir „ríka“ Péturssonar á Skarði og Elínar Þorsteinsdóttur (Skarðsætt).

Seinni kona Boga í Búðardal var Ingibjörg Sigurðardóttir kennslukona frá Kjalarlandi í Vindhælishreppi símstjóri í Búðardal og voru þau Bogi systrabörn.

Foreldrar mömmu byrjuðu búskap í húsinu nr. 4 við Vatnsstíg.

Þegar Kristján X. og drottning hans stigu á land í Reykjavík 25. júní 1930 var mamma önnur tveggja stúlkna sem færðu hjónunum blómvönd. Hún minntist þess hve djúpt hún hneigði sig fyrir kónginum á bryggjunni.

Mamma gekk í Austurbæjarskólann. Sr. Bjarni dómkirkjuprestur fermdi hana; hún var í danstímum hjá Rigmor Hanson, lærði hárgreiðslu í Iðnskólanum og var nemi á Hárgreiðslustofunni Ondúla. Þar var og Magnúsína Guðmundsdóttir. Hún kom iðulega í heimsókn þegar við áttum heima á Lokastíg 16. Önnur vinkona mömmu hét Dídí Ingvars. Enn átti mamma þessar vinkonur: Sigríði Kjartansdóttur konu Tryggva járnsmiðs, Ástu Jónsdóttur konu Árna í Glóbus, Ídu Ingólfsdóttur í Steinahlíð og tengdamóður sína, Ingveldi Rósenkranz.

Mamma var í sveit hjá Boga afa sínum og frænku í Búðardal.

26. júlí 1947 giftist hún Birni Rósenkranz Einarssyni. Sr. Bjarni gaf þau saman. Afi og amma höfðu keypt helming hússins nr. 6a við Frakkastíg þar sem við mamma vorum fyrstu æviár mín. Pabbi og mamma tóku á leigu risíbúð í húsinu nr. 48 við Miklubraut. Þau eignuðust fimm börn: Gunnar, Björn, Ragnar, Ragnheiði og Odd.

Mamma lagði á konum hárið. Meðal þeirra voru Lovísa kona Þórðar og Pálína Kjartansdóttir frá Vestra-Geldingaholti í Gnúpverjahreppi.

Foreldrar okkar keyptu íbúð í Stigahlíð 6 og seinna á Bókhlöðustíg 8.

Undir lok 6. áratugarins rak mamma með Elísabetu systur sinni hárgreiðslu- og snyrtistofu á neðri hæðinni á Frakkastíg 6a.

Mamma talaði aldrei um sjálfa sig, en brá hins vegar fyrir sig málsháttum. Í þeim birtist þunglyndisleg viska sem kynslóðir höfðu verið lengi að heyja sér og gerði hún þessa glaðlyndu og hláturmildu konu að alvörugefnum spekingi.

Hún var 26 ára þegar ég fór í skóla. Ég tók eftir því að mæður strákanna voru fullorðinslegri en hún, báru hatta sem fest hafði verið á svokallað slör. Ég spurði mömmu hvort hún myndi fáanleg til þess að kaupa sér svona hatt. Hún skreytti söguna með því að ég hefði átt að segja að ég vildi síður eiga mömmu sem liti út eins og stelpa!

Í skólanum átti ég að skrifa ritgerð heima. Ég sat og nagaði blýantinn en mamma skrifaði stílinn fyrir mig. Kennarinn las hann upphátt fyrir bekkinn. Þar sagði frá því að Vigdís amma mömmu hefði spurt strætisvagnabílstjóra hvort þetta væri Njálsgata-Gunnarsbraut en hann svarað: Nei, þetta er strætisvagn.

Ef ég spurði mömmu hvað hún vildi fá í afmælis- eða jólagjöf svaraði hún ófrávíkjanlega: Koss og gott skap.

Mamma byrjaði bænir sínar svona: „Góði Guð og allir englarnir! Viljið þið passa …“

Mamma vann hjá Bjarna Konráðssyni lækni. Þær Ragnhildur kona Bjarna urðu perluvinkonur.

Hún vann og lengi við að hafa til kaffið handa kennurum Menntaskólans í Reykjavík; þau Guðni rektor voru bæði komin af Jafet Einarssyni Johnsen gullsmið í Reykjavík og Þorbjörgu Nikulásdóttur.

Mamma dó 14. nóvember 1999. Útförin var að ósk hennar haldin í kyrrþey að þeim einum viðstöddum sem hún hafði ákveðið að fengju að koma.

Gunnar Björnsson.