„Það er mikilvægt að tryggja öryggi bæði gangandi og hjólandi vegfarenda en jafnframt að umferðin gangi vel fyrir sig,“ segir Aðalsteinn Haukur Sverrisson borgarfulltrúi Framsóknarflokksins.
Aðalsteinn lagði fram tillögu á fundi umhverfis- og skipulagsráðs Reykjavíkurborgar í vikunni um að gerð yrðu undirgöng á gatnamótum Sæmundargötu og Hringbrautar. Eins og kom fram í Morgunblaðinu á miðvikudag var samþykkt í ráðinu í vikunni að borgaryfirvöld hæfu samtal við Vegagerðina um að setja upp nýja ljósastýrða gangbraut á umræddum gatnamótum. Sem kunnugt er má finna aðra gangbraut rúmlega 100 metrum norðar, við Þjóðminjasafnið.
Í tillögunni segir að undirgöng á þessum stað myndu leysa ákveðinn „flæðisvanda gangandi og hjólandi vegfarenda og tryggja öryggi þeirra til muna“, eins og það er orðað. Afgreiðslu tillögunnar var frestað á fundi ráðsins fram í næstu viku.
Borgarfulltrúinn segir í samtali við Morgunblaðið að þessi tillaga eigi sér nokkurn aðdraganda. Ósk frá nemendum við HÍ um nýja gangbraut hafi komið inn á borð borgarfulltrúa þegar Framsóknarflokkurinn var í meirihluta. Hann kveðst ekki hafa verið hlynntur því að gera ætti aðra gangbraut skammt frá annarri slíkri og lagt til að koma samtalinu í áttina að undirgöngum.
„Þau myndu bæta flæði fyrir gangandi og hjólandi án þess að drepa flæði umferðar. Hringbrautin er náttúrlega þjóðvegur í þéttbýli og tenging við annað sveitarfélag. Þetta er vissulega kostnaðarsamari útfærsla en ég tel að það sé þess virði svo að öllum líði vel.“ hdm@mbl.is
Til baka
Leita í greinasafni
Prenta grein