Liðsmenn hvattir til vopnaburðar

Vígamenn hryðjuverkasamtaka Hamas um heim allan eru hvattir til að grípa til vopna og mótmæla þeim áformum Bandaríkjaforseta að flytja íbúa Gasa burt frá svæðinu. Vill forsetinn sjá fólkið flytja til Egyptalands eða Jórdaníu. Alþjóðasamfélagið hefur tekið illa í þessa hugmynd.

Í ljósi þessara áforma, segja leiðtogar Hamas, er nauðsynlegt að allir grípi til vopna, hvar sem þeir eru staddir í heiminum. „Sparið ekki sprengiefnið, skotfærin, hnífana eða grjótið. Rjúfið þögnina,“ segir í tilkynningu Hamas.

Bandaríkjaforseti sagði það munu taka mörg ár að endurreisa Gasasvæðið. Ekki sé hægt að líta á það sem byggilegt svæði nú. Taki Egyptar ekki á móti Gasabúum sé til skoðunar að stöðva aðstoð til Egyptalands.