Frumvarp um grásleppuveiðar

Þingmenn ríkisstjórnarflokkanna í atvinnuveganefnd hafa boðað umræður á fundi nefndarinnar í dag um frumvarp um grásleppuveiðar sem var ekki á þingmálaskrá ríkisstjórnarinnar.

Frumvarpið miðar að því að endurvekja fyrra fyrirkomulag um leyfisveitingar fyrir grásleppuveiðar og afnema kvótasetningu sem kom til sögunnar með lögum í fyrra. Formaður nefndarinnar er Sigurjón Þórðarson, þingmaður Flokks fólksins, en í nefndinni er einnig Lilja Rafney Magnúsdóttir, þingmaður Flokks fólksins, sem sagði sig úr Vinstri grænum á síðasta ári eftir að flokkurinn samþykkti frumvarp um kvótasetningu grásleppu.

Grásleppan var kvótasett á síðasta ári í þeim megintilgangi að tryggja sjálfbærar grásleppuveiðar sem þóttu ómarkvissar og ófyrirsjáanlegar, en þær höfðu áður verið háðar rétti til veiða samkvæmt leyfi frá Fiskistofu.

Í greinargerð frumvarpsins segir að kvótasetningin þjóni hvorki hagsmunum atvinnugreinarinnar né nytjastofnsins og þar með þjóni það ekki hagsmunum almennings. Er frumvarpinu ætlað að tryggja atvinnuréttindi þeirra sem stundað hafa grásleppuveiðar um árabil og hafa ekki aflaheimildir í öðrum fisktegundum.

„Grásleppuveiðar skulu háðar sérstöku leyfi Fiskistofu og eiga þeir bátar einir kost á slíku leyfi sem rétt áttu til leyfis á grásleppuvertíðinni 1997 samkvæmt reglum þar um,“ segir í frumvarpinu.