Orkubú Vestfjarða hefur ákveðið að sækja um virkjunarleyfi fyrir Kvíslatunguvirkjun í Steingrímsfirði. Fari svo að ráðist verði í virkjunina verður það stærsta einstaka verkefni sem Orkubúið hefur ráðist í samkvæmt tilkynningu frá OV.
Áformað afl virkjunarinnar er 9,5 MW í byrjun og má gera ráð fyrir að hún framleiði um 60 GWst að meðaltali á ári. Mjólkárvirkjun er stærsta virkjun Orkubúsins og samanstendur í rauninni af þremur virkjunum, sem samtals eru 11,2 MW.
Virkjunin hefur þegar farið í gegnum umhverfismat, en beðið er eftir endanlegri staðfestingu aðalskipulags Strandabyggðar. Lengi hefur afhendingaröryggi raforku á Vestfjörðum verið í umræðunni og segir OV virkjunina geta bætt þar úr. „Virkjunin fellur vel að þeim markmiðum stjórnar Orkubús Vestfjarða að tryggja næga orkuöflun félagsins innan Vestfjarða, auka afhendingaröryggi raforku á Vestfjörðum og gera félaginu kleift að taka þátt í grænum orkuskiptum á Vestfjörðum í samræmi við stefnu stjórnvalda,“ segir í tilkynningunni og talið er að virkjunin verði arðbært verkefni.
„Kvíslatunguvirkjun hefur alla burði til að verða arðbært verkefni fyrir Orkubúið. Virkjunin mun auk þess hafa afgerandi áhrif á afhendingaröryggi rafmagns á Ströndum, á Reykhólum og í Inndjúpi, en reiknað er með að það aukist um allt að 90%. Virkjunin mun því draga mikið úr kostnaði við framleiðslu orku með díselvélum og minnka um leið losun gróðurhúsalofttegunda vegna keyrslu varaafls á því svæði. Áætlaður kostnaður við byggingu virkjunarinnar er ríflega 7 milljarðar króna. Stefnt er að því að hefja undirbúningsframkvæmdir í sumar, en aðalframkvæmdirnar verði á árinu 2026 og 2027. Áætlanir gera ráð fyrir að virkjunin verði farin að framleiða raforku í árslok 2027.“
Til baka
Leita í greinasafni
Prenta grein