Eftir að hafa lagt til atlögu við helstu undirstöðuatvinnugrein þjóðarinnar með gríðarlegum skattahækkunum, atlögu sem enn sér ekki fyrir endann á, hefur ríkisstjórnin ákveðið að rétt sé að leggja til fjölskyldunnar.
Nú er það samsköttun hjóna og sambýlisfólks sem ríkisstjórnin vill afnema með tilheyrandi skattahækkun fyrir fjölda fjölskyldna. Mögulega verður þetta útskýrt sem leiðrétting eins og hin skattahækkunin og ef til vill var líka til athugunar að láta þessa skattahækkun vera afturvirka, en fyrst og fremst er þetta auðvitað til marks um að engu verður eirt í viðleitni ríkisstjórnarinnar til að hækka álögur á almenning og atvinnulíf í landinu.
Guðrún Hafsteinsdóttir formaður Sjálfstæðisflokksins spurði Daða Má Kristófersson fjármálaráðherra út í þessa nýjustu skattahækkun og benti á að þetta myndi hafa „djúpstæð áhrif á fjölskyldur um land allt. Þeir sem lenda í tímabundnu ójafnvægi í tekjum, til dæmis vegna náms, veikinda eða barnauppeldis, munu nú greiða hærri skatta, einmitt þegar svigrúmið er minnst. Þegar annað foreldrið neyðist til að vera heima með barn vegna skorts á leikskólaplássi, þegar foreldri er í fæðingarorlofi eða þegar par skiptir með sér ábyrgð og annað er í námi þá hækkar skattbyrði heimilisins. Það gerist nákvæmlega þegar tekjurnar eru minnstar og útgjöldin eru mest.“
Til baka
Leita í greinasafni
Prenta grein