Gömul eldstöð minnir á sig

Órói á Torfajökulssvæðinu sótti aftur í sig veðrið á níunda tímanum í gærkvöldi eftir að hafa dottið niður á laugardag. Sérfræðingar segja að óróinn tengist líklega breytingum í háhitakerfi á svæðinu. Ekki sé þó búist við eldgosi vegna óróans.

Þetta gerðist í framhaldi af því að órói jókst um hádegi í á laugardag en dó svo niður skömmu síðar. En svo jókst óróinn að nýju í gær, sunnudag, og skjálftavirknin með. Sumir skjálftar hafa mælst stærri en 1 að stærð.

Að sögn Minneyjar Sigurðardóttur, náttúruvársérfræðigns á Veðurstofu Íslands, var atburðurinn enn „í gangi“ þegar Morgunblaðið sló á þráðinn hjá Veðurstofunni í gærkvöldi. Hún sagði aftur á móti að ekki væri tilefni til þess að búast við eldgosi að svo stöddu.

Næstmesta jarðhitasvæði landsins

Torfajökull er eldstöðvakerfi milli Mýrdalsjökuls og Þórisvatns. Síðasta gos í Torfajökli varð árið 1477 og myndaði þá Laugahraun og Námshraun. Um júní 2023 mældist landris í Torfajökulseldstöðinni en lítið fréttnæmt hefur gerst í þeim efnum síðan þá.

„Við teljum þetta vera tengt breytingu á háhitasvæðinu,“ segir Minney í samtali við Morgunblaðið en eldstöðin er auk þess næstmesta háhitakerfi á landinu, á eftir Grímsvötnum. Askjan í jöklinum er auk þess stærsta askja landsins.

„Við erum ekkert að túlka þetta á einn eða annan hátt akkúrat núna. Sérfræðingarnir fá að túlka þetta betur [í dag],“ bætir Minney við.

„En við erum að fylgjast með stöðunni og sjá hvað gerist.“