Kristólína Ólafsdóttir fæddist 11. október 1930 í Borgarnesi. Hún lést á Hjúkrunarheimilinu Skógarbæ 20. maí 2025.

Foreldrar hennar voru hjónin Ólafur Klemensson, f. 10. október 1893, d. 14. apríl 1961, og Hjörtfríður Kristjánsdóttir, f. 20. júlí 1900, d. 10. febrúar 1966. Bræður Kristólínu voru: Jón, f. 1. desember 1926, d. 28. apríl 2006, Kristján Einar, f. 9. maí 1928, d. 31. ágúst 2019, og Agnar Már, f. 4. janúar 1944, d. 7. júlí 2016.

Þann 24. nóvember 1951 giftist Kristólína Jóni Benediktssyni, f. 26. janúar 1923, d. 2. mars 2019, syni hjónanna Benedikts Jónassonar, f. 19. febrúar 1888, d. 14. september 1948, og Guðrúnar Guðjónsdóttur, f. 28. janúar 1894, d. 4. október 1976. Sonur þeirra er Ólafur Hjörtur, fyrrverandi framhaldsskólakennari, f. 20. apríl 1951. Hann er kvæntur Guðlaugu Björgu Björnsdóttur lyfjafræðingi, f. 11. febrúar 1950. Guðlaug á dótturina Áslaugu Helgadóttur af fyrra hjónabandi. Börn Áslaugar eru Guðlaug Helga, Sigtryggur, Kristján Helgi og Hrafn Hákon. Barn Guðlaugar Helgu er Elvar Þór.

Jón og Kristólína hófu búskap á Bergþórugötu 51 en 1967 fluttu þau á Grandaveg 4 og 1992 á Aflagranda 40 þar sem Kristólína bjó þar til hún flutti í Skógarbæ árið 2023. Kristólína stundaði nám við Húsmæðraskólann á Varmalandi 1948-1949. Framan af sinnti hún húsmóðurstörfum en fór síðan að vinna utan heimilis. Hún vann meðal annars sem húshjálp hjá Völu og Gunnari Thoroddsen, á kaffistofu Ríkisútvarpsins en lengst vann hún hjá Heildverslun Agnars Ludvigssonar ehf.

Útför Kristólínu fer fram frá Neskirkju í dag, 2. júní 2025, klukkan 13.

Mig langar að minnast föðursystur minnar, Kristólínu, eða Kiddó eins og hún var alltaf kölluð. Það var alltaf mikill samgangur á milli pabba míns og Kiddóar. Eftir að við fjölskyldan fluttum frá Þórshöfn til Keflavíkur voru heimsóknir tíðari á báða bóga. Það var alltaf gott að koma til þeirra hjóna, Kiddóar og Jóns, og sonar þeirra Ólafs Hjartar. Þau voru öll einstakir gestgjafar sem nutu þess að fá okkur í heimsókn og gera vel við okkur. Í herbergi Ólafs Hjartar, eða Óla eins og hann er kallaður, var fullt af bókum sem hann hafði gaman af að sýna okkur systkinunum og var Ástríkur í miklu uppáhaldi hjá mér. Jón var líflegur og skemmtilegur og hafði sérstaklega gaman af því að leika við okkur systkinin, segja okkur sögur og taka nokkur dansspor með okkur í stofunni sem okkur þótti nú ekki leiðinlegt.

Kiddó hafði gaman að fylgjast með þessu öllu og passaði hún upp á að allir fengju nóg að borða og galdraði fram kaffiborð með dýrindis kökum sem hún hafði bakað og ekki má gleyma steiktu kleinunum og pönnukökunum sem voru alveg einstaklega góðar. Hún var snillingur í að gera gott bakkelsi með kaffinu.

Alla tíð var Kiddó mikil hannyrðakona og eftir hana liggja stórar útsaumsmyndir og klukkustrengir. Hún var afar flink í að gera barnapeysur, húfur, hosur og fleira sem mín börn fengu frá henni. Þá var ég ekki farin að prjóna sjálf og þótti vænt um að fá svona fallegt handverk frá henni.

Kiddó var af gamla skólanum og henni fannst nú alveg sjálfsagt að ég eldaði mat, þrifi heima hjá mér og hugsaði um þvottinn eins og konur af hennar kynslóð gerðu gjarnan. Ég held að henni hafi þótt nóg um að minn maður eldaði yfirleitt veislumatinn þegar við vorum með matarboð og svo þurfti hann að taka sig sjálfur til í veiðiferðir og hugsa um börn og bú ef ég var ekki heima.

Kiddó var alltaf einstaklega minnug og aldrei stóð á svari þegar maður þurfti að fá að vita um ættmenni sín. Hún fylgdist alla tíð með þjóðfélagsumræðunni og var alltaf vel inni í þeirri umræðu og fróð um menn og málefni. Að sama skapi var hún alltaf mjög dugleg og viljasterk. Hún vildi bjarga sér sjálf eins lengi og hún gat. Þegar hún var komin inn á hjúkrunarheimili og orðin nánast blind og heyrnarlaus þá bjargaði hún sér ótrúlega vel sjálf og gerði alltaf það sem hún gat og meira til.

Elsku Kiddó, nú er komið að leiðarlokum og ég veit að þú ert hvíldinni fegin. Ég og Sibbi viljum þakka þér fyrir öll góðu árin í gegnum tíðina. Megi Guð geyma þig og ég veit að það verður gott fyrir þig að hitta fólkið þitt aftur.

Við sendum innilegar samúðarkveðjur til Óla, Gullu og fjölskyldu.

Hvíl í friði elsku Kiddó.

Brynja og
Sigurbjörn (Sibbi).