Ný stjórn kjörin
hjá Skýrr hf.
NÝ stjórn hefur verið kjörin hjá
Skýrr hf. í kjölfar kaupa Opinna kerfa hf. á 51% hlutafjár ríkis, Reykjavíkurborgar og Rafmagnsveitu Reykjavíkur í fyrirtækinu.
Á hluthafafundi í Skýrr 5. júní sl. voru kjörin í stjórnina Hallgrímur Snorrason, Margrét Guðmundsdóttir, Frosti Bergsson, Sindri Sindrason og Hreinn Jakobsson. Á fyrsta fundi nýrrar stjórnar í síðustu viku var Frosti kjörinn stjórnarformaður og Hreinn varaformaður stjórnar.
Frosti sagði í samtali við Morgunblaðið að fulltrúar Opinna kerfa hefðu verið að kynna sér innviði Skýrr að undanförnu og átt fundi með öllu starfsfólki. "Það hefur margt jákvætt komið í ljós í starfsemi Skýrr. Fyrirtækið er eitt fárra tölvufyrirtækja sem hlotið hefur ISO 9000 vottun. Þá er það að vinna að þróun á kerfum í hugbúnaðarkerfinu AGRESSO og er að setja upp kerfi fyrir Reykjavíkurborg og Rafmagnsveitu Reykjavíkur," sagði hann.