Sprettharðir
spyrnubílar
TVÖFÖLD umferð verður ekin í
sandspyrnu á Akureyri á laugardaginn og sker úr um hver verður Íslandsmeistari í sandspyrnu. Er búist við að mörg Íslandsmet falli þar sem öflugur floti sérsmíðaðra spyrnutækja mætir til leiks. Eru 38 keppendur skráðir til keppni, mótorhjól, bílar, jeppar og vélsleðar.
Sigurvegari síðasta torfærumóts í flokki sérútbúinna jeppa, Einar Gunnlaugsson, færir vélina í torfærujeppanum í sérsmíðaða spyrnugrind. Hann mun mæta harðri keppni. Egilsstaðabúinn Þórir Schiöth tók vélina úr torfærujeppa sínum og setti í fyrrum fyrrum meistaragrind í kvartmílu, sem Ólafur Pétursson ók. Hafliði Guðjónsson keppir á keppnisgrind, en hann varð meistari í fyrra, og Valur Vífilsson, sem varð nýlega meistari í kvartmílu, munu elda grátt silfur saman. Allir þessir kappar aka í opnum flokki.
"Ég fagna meiri samkeppni en það var fróðlegt að sjá hvað andstæðingarnir gera með ofurvélarnar úr torfærunni. Það má ekkert út af bera í sandspyrnu. Kannski verð ég að bæta við nítróskammtinn minn, en í fyrra skilaði vélin um 650 hestöflum," sagði Hafliði í samtali við Morgunblaðið. Hann vann sprettharðasta flokkinn og setti nýtt Íslandsmet, ók á 3,82 sekúndum. Ég vonast til að slá metið á ný. Það er kúnst að keyra þessi ökutæki í sandinum. Aðalmálið er að stilla þau af í rásmarkinu og standa svo allt í botni á græna ljósinu. Framhjólin eru oftast á lofti alla brautina, þú stýrir varla neitt. Það gæti einhver prjónað yfir sig í keppninni því aflið í sumum tækjum er ótrúlega mikið. Valur Vífilsson verður erfiður viðureignar, hann er með mikla reynslu og nýkrýndur meistari í kvartmílu. En ég er hvergi banginn," sagði Hafliði.
Sex keppendur eru í flokki útbúinna jeppa, m.a. Gísli G. Jónsson, nýkrýndur meistari í torfæru, Helgi Schiöth, Steingrímur Bjarnason og Kristján Hreinsson. Í flokki vélsleða mætir m.a. Stefán Þengilsson á 1.200 cc vélsleða, einum þeim öflugasta á landinu.
Morgunblaðið/Gunnlaugur Rögnvaldsson ÞETTA ökutæki Einars Gunnlaugssonar verður með hátt í þúsund hestafla vél sem kemur úr torfærujeppa kappans.