GEÐLÆKNAFÉLAG Íslands telur áætlanir um stórfelldan niðurskurð fjárveitinga til geðdeildanna í Reykjavík vera fráleitar og fyrir neðan allt velsæmi og muni hugmyndirnar leiða til aukins kostnaðar fyrir samfélagið og lakari þjónustu.

Geðlæknar segja niðurskurð

fyrir neðan allt velsæmi

GEÐLÆKNAFÉLAG Íslands telur áætlanir um stórfelldan niðurskurð fjárveitinga til geðdeildanna í Reykjavík vera fráleitar og fyrir neðan allt velsæmi og muni hugmyndirnar leiða til aukins kostnaðar fyrir samfélagið og lakari þjónustu.

Fundur sem haldinn var í Geðlæknafélaginu í gærkvöldi skorar á stjórnvöld að draga tillögur þessar til baka því óeðlilegt sé að láta niðurskurð bitna á þeim sem síst geta borið hönd fyrir höfuð sér.

Geðlæknafélagið telur að nái samkomulag heilbrigðis- og tryggingamálaráðherra, fjármálaráðherra og borgarstjórans í Reykjavík frá 12. september síðastliðnum, sem feli í sér niðurskurð á þjónustu við geðsjúka, fram að ganga muni þjónusta við geðsjúka á landinu skerðast verulega.

Flutningur geðdeildar úr aðalbyggingu SHR sé stórt skref aftur til fortíðar og um leið skerðist þjónusta á stærstu slysavarðstofu landsins, sem verði að geta veitt geðlæknisþjónustu í bráðum tilfellum allan sólarhringinn. Slíkt sé óframkvæmanlegt ef geðdeildin sé ekki í sömu byggingu.