Sigurður Freysteinsson Með þessum orðum viljum við kveðja samnemanda okkar og félaga, Sigurð Freysteinsson.

Fátt er um orð á stundu sem þessari. Óréttlæti lífsins birtist okkur í sinni verstu mynd þegar ungur maður á besta aldri fellur frá. Eftir stöndum við hljóð.

Þau okkar sem fengu tækifæri til að kynnast Sigurði fundu í honum greindan mann og skemmtilegan. Hann lét lítið yfir sér en bjó yfir miklum fróðleik og munum við sakna sárt áhugaverðra viðræðna við hann.

Hann hvíli í friði.

Fölblátt

eins og silki

fljótið

í farvegi sínum.

Líkt og draumur

sem birtist

hverfur það mér.

Í leiðslu ég stari

í straum þess

og finn

hvernig ævi mín

hverfist í fljótið

sem fellur fram

eins og fölblátt silki

líkt og draumur

sem birtist

og hverfur.

(Þuríður Guðmundsdóttir.) Við vottum fjölskyldu hans og aðstandendum okkar dýpstu samúð.

Nemendur í tölvunarfræðum við Háskóla Íslands.