RÚNAR KRISTJÁNSSON
Í SKÁLHOLTI
Hér á þessum helga stað
hljómar berast víða að
þegar landsins líf og sál
leggur fram sín bænarmál.
Hér er andlegt höfuðból,
heilla alda trúarskjól,
helgidómur lýðs og lands,
ljós og gæfa friðarbands.
Glötum aldrei góðri trú,
glæðum hana í brjóstum nú.
Eflum kristinn kærleikssjóð,
krossinn blessar land og þjóð.
Blessun sú er sigur Hans
sem er forsjá kærleikans.
Hér á þessum helga stað
hægast er að skilja það.
Því skal heit frá sálum send
sérstök bæn með þakkarkennd
út um landsins byggðu ból:
BLESSI DROTTINN SKÁLHOLTSSTÓL.
Höfundurinn býr á Skagaströnd.