ÁTÖK á milli Frelsishers Kosovo (KLA) og serbneskra lögreglu- og hersveita hafa staðið í sjö mánuði í Kosovo-héraði Sambandslýðveldisins Júgóslavíu. Þorri íbúa héraðsins eru Kosovo-Albanir, albönskumælandi múslimar, en Frelsisherinn berst fyrir sjálfstæði héraðsins frá serbneskum stjórnvöldum í Belgrad. Hörð átök undanfarinna mánaða hafa stökkt að minnsta kosti 270 þúsund manns á flótta.
Um 270.000 manns hafa flúið heimili sín í Kosovo-héraði frá því í febrúar

Talið að 50.000 manns hafist við undir berum himni

Belgrad, Brussel. Reuters.

ÁTÖK á milli Frelsishers Kosovo (KLA) og serbneskra lögreglu- og hersveita hafa staðið í sjö mánuði í Kosovo-héraði Sambandslýðveldisins Júgóslavíu. Þorri íbúa héraðsins eru Kosovo-Albanir, albönskumælandi múslimar, en Frelsisherinn berst fyrir sjálfstæði héraðsins frá serbneskum stjórnvöldum í Belgrad. Hörð átök undanfarinna mánaða hafa stökkt að minnsta kosti 270 þúsund manns á flótta. Flestir þeirra eru konur, börn og gamalmenni, en vopnfærir karlmenn hafa margir gengið til liðs við KLA. Talið er að 50.000 manns hafist nú við undir berum himni í Kosovo-héraði. Neyð þessa fólks er mikil og ljóst að margra bíður lítið annað en sultur og seyra á komandi vetri.

Enn hálf milljón flóttafólks í Júgóslavíu

Hjálparstofnanir hafa nýlega reynt að vekja athygli heimsbyggðarinnar á hlutskipti flóttafólks á Balkanskaga. Auk þeirra tæplega 270 þúsund manna sem flúið hafa átökin í Kosovo eru enn um 560.000 flóttamenn í Serbíu og Svartfjallalandi. Fólk sem enn hefur ekki getað snúið til síns heima eftir að stríðinu í Júgóslavíu lauk árið 1995.

Erfitt hefur reynst að afla fjár til aðstoðar við flóttafólk í Serbíu og Svartfjallalandi á undanförnum misserum. "Rauða kross hreyfingin og Flóttamannahjálp Sameinuðu þjóðanna óttast að ástandið í Kosovo geri okkur enn erfiðara um vik en áður við að afla fjár til hjálparstarfa hér [í Júgóslavíu]," sagði Thomas Merkelbach hjá Alþjóðaráði Rauða krossins í Belgrad.

Sadako Ogata, framkvæmdastjóri Flóttamannahjálpar SÞ, er nú á ferð um Balkanskaga til þess að ræða flóttamannavandann við stjórnvöld í Júgóslavíu, Albaníu og leiðtoga aðskilnaðarsinna í Kosovo- héraði. Erindi Ogata við leiðtoga á Balkanskaga er meðal annars að tryggja að réttindi séu ekki brotin á flóttafólki og hvetja til þess að aðstæður skapist til þess að það geti snúið heim sem fyrst.

Fleiri leita hælis í ESB-löndum

Mun fleiri ríkisborgarar Sambandslýðveldisins Júgóslavíu hafa sótt um hæli sem flóttamenn í löndum Evrópusambandsins (ESB) á þessu ári en áður. Þetta kom fram á fundi innanríkisráðherra ESB í Brussel á fimmtudag. 70-90% umsækjenda eru frá Kosovo-héraði. Aukningin er 600% í júlí og ágúst í Bretlandi einu, en í Belgíu hafði fjöldi umsókna tvöfaldast í þessum mánuði.