ÁLFAR og álfabyggðir voru til umræðu fyrir skömmu. Þeir sem skyggnir eru sjá þessar verur og þeir, sem þessa skyggnu menn þekkja, efast ekki um sannleiksgildi frásagna þeirra. Kvikmyndin "Fairy Tale", sem Regnboginn sýndi, greinir frá einu frægasta dæmi um þetta efni, blómálfamyndunum. Um það hafa verið skrifaðar greinar og bækur og það rannsakað í bak og fyrir. Sönnunin var á borðinu.
Falsaðar ljósmyndir af blómálfum

Frá Jóni Brynjólfssyni:

ÁLFAR og álfabyggðir voru til umræðu fyrir skömmu. Þeir sem skyggnir eru sjá þessar verur og þeir, sem þessa skyggnu menn þekkja, efast ekki um sannleiksgildi frásagna þeirra.

Kvikmyndin "Fairy Tale", sem Regnboginn sýndi, greinir frá einu frægasta dæmi um þetta efni, blómálfamyndunum. Um það hafa verið skrifaðar greinar og bækur og það rannsakað í bak og fyrir. Sönnunin var á borðinu. Atburðarásin byrjaði 1918.

Tíu ára stúlka Frances Griffiths og Elsie frænka hennar komust yfir myndavél og tóku (svart-hvítar) ljósmyndir af blómálfum að leik við þær úti í garði. Filman og myndirnar voru rannsakaðar af sérfræðingum og reyndust ófalsaðar og trúverðugar á allan hátt. Voru myndirnar taldar sanna endanlega tillvist blómálfa. Annars væru þær ekki til.

Í grein í Mbl. 26. ágúst bls. 51 um myndina segir m.a.: "Jafnvel enn þann dag í dag vekja ljósmyndirnar, sem stúlkurnar tóku, ýmsar spurningar, sem ekki hefur verið svarað, og hafa þær meðal annars verið viðfangsefni í sjónvarpsþáttunum Ráðgátum, "The X-Files"."

Það er ekki rétt, að spurningum hafi ekki verið svarað, eins og kemur fram hér á eftir.

Hildur Lftsdóttir skrifar í Mbl. fallega grein, "Alvöru blómálfar", þar sem hún lýsir þessu ævintýri stúlknanna og leggur áherslu á sannsögulegt gildi þess.

Sjálfur las ég á sínum tíma bók um þetta atvik og sá ekki ástæðu til að véfengja frásögnina.

Því miður var þetta ævintýri uppspuni frá rótum, og þess vegna er nauðsynlegt, að sannleikurinn komi í ljós.

Sjónvarpsstöðin "Discovery" sýndi í sumar viðtal við a.m.k. aðra frænkuna, sm nú er orðin fjörgömul, níræð. Í viðtalinu segir hún, hvað hún gerði, þegar hún var 10 ára. Þar með varð þetta mikla deilumál endanlega upplýst.

Í viðtalinu kom fram, að þær frænkur hefðu gert þetta að gamni sínu, í leikaraskap. Þær studdust við ljósmyndir og teikningar af ungum stúlkum, teiknuðu myndirnar upp á pappaspjöld, teiknuðu á þær stílfærð föt og vængi og annað og klipptu út. Þannig gerðu þær nokkur líkön af blómálfum. Þær fóru í góðu veðri á sunnudegi í sparifötunum með líkönin út í blómagarð, hengdu þau upp í trjágreinar með svörtum tvinna. Svo fór önnur að leika sér við líkönin, en hin tók ljósmyndir af leiknum.

Líkönin voru látin sveiflast til og þá urðu myndirnar "hreyfðar" og svo virtist, sem álfurinn væri á flugi. Mig minnir, að þær hafi líka notað "ofanítökur" til að sýna álfana sem gegnsæja. Það er þekkt aðferð við fölsun til að sýna á ljósmynd verur "úr öðrum heimi".

Þeir sem séð hafa ljósmyndirnar geta ekki annað en dáðst að, hve vel líkönin eru gerð og vel ljósmyndirnar eru gerðar og hve 10 ára fyrirsætan leikur vel

Þarna eru 10 ára stúlkur að saklausum leik, sköpunargleðin og hugmyndaflugið á fullu og árangurinn ótrúlegur. Við skulum virða það við fjörgamla konu, að hún skuli að lokum segja sannleikann, eftir 80 ár, áður en það var orðið of seint. Annars hefði hann sennilega aldrei komið í ljós.

Eigum við ekki bara að segja, að þetta hafi verið "Photoshop 1918".

JÓN BRYNJÓLFSSON,

verkfræðingur,

Bárugötu 20, Reykjavík.