Sumir hafa verið í kórnum frá upphafi

Drengjakór Laugarneskirkju Sumir hafa

verið í kórnum

frá upphafi

Í kvöld, miðvikudaginn 16. desember, verða í Seltjarnarneskirkju jóla- og útgáfutónleikar Drengjakórs Laugarneskirkju. Friðrik S. Kristinsson er stjórnandi kórsins.

"Drengjakór Laugarneskirkju var stofnaður haustið 1990 og hann var og er eini drengjakór landsins. Í byrjun voru fimmtán drengir í kórnum en hann hefur stöðugt vaxið og nú eru kórfélagarnir orðnir þrjátíu og fimm."

­ Á hvaða aldri eru piltarnir?

"Drengirnir í kórnum eru á aldrinum átta til fjórtán ára og meðal kórfélaga eru piltar sem hafa sungið í kórnum frá upphafi, eða í níu ár. Þeir eru nú komnir í eldri deildina eins og við köllum þann kór. Þetta er þriðji veturinn sem sá kór er starfræktur og í honum eru átta piltar á aldrinum 17­19 ára."

­ Hvernig er starfi kórsins háttað?

"Í hverjum mánuði kemur kórinn reglulega fram við guðsþjónustur í Laugarneskirkju. Auk þess hefur hann haldið bæði jóla­ og vortónleika og síðan kemur hann fram við önnur margvísleg tækifæri." Í því sambandi segir Friðrik að megi nefna að kórinn kom fram í jólamessu biskups Íslands í sjónvarpinu árið 1991, hann kom fram hjá forseta Íslands á Bessastöðum sama ár, á aðventutónleikum með Karlakór Reykjavíkur árið 1995 og á Evróputónleikum ríkisútvarpsins árið 1997.

Hann segir að drengjakórinn hafi verið gestgjafi nokkurra erlendra drengjakóra og annaðhvert ár fer kórinn utan í söngför. "Þess á milli förum við um landið og höldum tónleika. Í sumar fórum við til Englands og fyrir tveimur árum var ferðast um Svíþjóð og Danmörku."

­ Er auðvelt að fá stráka til að syngja í kór?

"Já, það er nægilegt framboð af piltum sem vilja syngja í kór og það komast færri að en vilja. Við höfum miðað við að hafa ekki fleiri en 35 drengi í kórnum.

­ Hvernig lög syngur kórinn?

"Drengjakórinn er fyrst og fremst kirkjukór og syngur því marga sálma og lofsöngva.

Þar fyrir utan má segja að allt sé tekið fyrir og kórinn syngi allt frá Bach og að Bítlunum."

Friðrik segir að strákarnir syngi flest lög í þriggja radda útsetningum en í blönduðum kór eru lögin venjulega sungin í fjórum röddum. "Þegar eldri kórinn syngur með okkur syngjum við í fjögurra radda útsetningu."

­ Æfir kórinn mikið í viku hverri?

"Við æfum tvisvar í viku í Laugarneskirku og höldum svo aukaæfingar ef eitthvað stendur til eins og jólatónleikarnir í kvöld. Að baki kórnum stendur öflugt foreldrafélag og kórstarfið myndi aldrei ganga svona vel ef foreldrastarfsins nyti ekki við. Auk þess styður Laugarneskirkja vel við bakið á piltunum."

­ Hvað ætlið þið að syngja á tónleikunum í kvöld?

"Fyrri hluta tónleikanna flytjum við eingöngu lög af nýja diskinum okkar og eftir hlé verðum við með jólatónlist á dagskrá."

­ Er þetta í fyrsta skipti sem kórinn syngur inn á geisladisk?

"Nei, við höfum gert þetta einu sinni áður. Á þessum geisladiski kennir ýmissa grasa. Á honum syngur kórinn til dæmis verk eftir íslensk tónskáld eins og Te Deum eftir Þorkel Sigurbjörnsson. Þá er að finna á honum Vínarljóð eftir Frans Schubert en titillag kórsins er úr Vínarljóðinu og heitir Hvað vitið þið fegra?"

Friðrik segir að strákarnir syngi líka dúetta og einsöng. "Við erum líka með tvö ensk þjóðlög á diskinum sem við sungum í Englandi í sumar. Það má segja að þetta sé tónleikadiskur því á honum er efnisskráin sem við fórum með til Englands í sumar. Undirleikari á tónleikunum í kvöld er Peter Máté."

­ Hvað er framundan hjá kórnum?

"Við höfum að undanförnu einbeitt okkur að því að æfa fyrir tónleikana sem verða í kvöld í Seltjarnarneskirkju. 19. desember næstkomandi ætlum við að syngja með Sinfóníuhljómsveit Íslands á jólatónleikum hennar.

Þá syngur kórinn við messu í Laugarneskirkju klukkan 18 á aðfangadagskvöld. Á nýju ári förum við svo að æfa dagskrá fyrir vorið en þá er meiningin að halda í ferðalag um landið okkar og halda tónleika."

Tónleikar Drengjakórs Laugarneskirkju verða að þessu sinni haldnir í Seltjarnarneskirkju eins og komið hefur fram. Friðrik segir að með því að prófa að halda tónleikana í öðru húsnæði en Laugarneskirkju kynnist strákarnir því að syngja annars staðar en á heimavelli. Tónleikarnir sem hefjast klukkan 20.30 eru öllum opnir og verður miðasala við innganginn.

Friðrik Kristinsson er fæddur í Stykkishólmi árið 1961. Hann tók söngkennarapróf frá Söngskólanum í Reykjavík árið 1987.

Friðrik hefur starfað sem söngkennari og söngstjóri undanfarin 9 ár og verið söngstjóri Snæfellingakórsins, Karlakórs Reykjavíkur og Drengjakórs Laugarneskirkju.

Eiginkona hans er Þórdís Helgadóttir hárgreiðslumeistari og eiga þau 2 dætur.

Jóla- og útgáfutónleikar í kvöld

Friðrik Kristinsson