Aukin framlög til háskóla

Aukin framlög til háskóla

ÁÆTLAÐ er að heildargjöld málefnaflokksins Háskólar og rannsóknir hækki um rúman milljarð og verði 7.743 milljónir króna. Sé leiðrétt fyrir flutning myndlistarnáms á háskólastig er hækkunin 875 milljónir á milli ára.

Til málefnaflokksins teljast m.a. Háskóli Íslands og tengdar stofnanir, Háskólinn á Akureyri, Tækniskóli Íslands, Kennaraháskóli Íslands, Rannsóknastofnun uppeldis- og menntamála, Samvinnuháskólinn, Viðskiptaháskólinn í Reykjavík, Listaháskóli Íslands, Rannsóknarráð Íslands og ýmsir rannsóknasjóðir.

Heildargjöld Háskóla Íslands eru áætluð 3.800 milljónir kr. og hækka um 473 milljónir frá fjárlögum þessa árs. Áætlað er að á móti rekstrargjöldum upp á 3.429 milljónir komi 923 milljóna kr. sértekjur og nema þær 26,9% rekstrargjalda. Nýr fjárlagaliður, Ritlauna- og rannsóknasjóður prófessora, kemur nú til sögunnar í kjölfar úrskurðar kjaranefndar um laun prófessora. Á þennan lið eru færðar 60 milljónir af framlagi til háskólans.

Annar nýr fjárlagaliður í þessum málefnaflokki snýr að Listaháskóla Íslands. Þar er gert ráð fyrir 169 milljóna króna rekstrarútgjöldum á fyrsta starfsári skólans og 157 milljóna króna framlagi til hans. Samkvæmt tveggja ára samningi skólans við menntamálaráðuneytið sem tók gildi 1. ágúst sl. tók skólinn við nemendum og rekstri Myndlista- og handíðaskólans (MHÍ). Framlög til MHÍ, 92 milljónir af fjárlögum 1999 og 51 milljón frá Reykjavíkurborg, færast á þennan fjárlagalið. Frá ágúst á næsta ári er gert ráð fyrir að framlög til skólans verði ákvörðuð eftir nýjum reiknireglum.

Miðað er við að skólinn annist leiklistarkennslu á háskólastigi skólaárið 2000­2001 og verður þá hætt rekstri Leiklistarskóla Íslands. Stefnt er að því að gera heildarsamning við Listaháskólann um listmenntun á háskólastigi frá og með ágúst árið 2001.

Kostnaðarflokkun náms

Nú er að ljúka vinnu við gerð reiknireglna um kostnað við kennslu í háskólum og mun menntamálaráðuneytið gefa þær út á næstunni. Námi er skipt í nokkra flokka og er reiknað út meðalverð á nemanda sem stundar fullt nám til lokaprófs í hverjum flokki. Gert er ráð fyrir að greiða nálægt 300 þúsund kr. fyrir hverjar 30 einingar sem hver innritaður nemandi í lægsta verðflokki gengur til prófa í. Í lægsta verðflokki, með verðhlutfall 1, er t.d. nám á sviði félags- og mannvísinda, guðfræði, lögfræði og annað sambærilegt. Nám í tannlækningum fær hæsta verðhlutfall eða 5,2.

Frá verði sem þannig er reiknað út dregst m.a. skrásetningargjald nemenda og fjárhæð vegna fjárbindingar í húsnæði sem þegar er búið að byggja fyrir fé ríkisins og er umfram fermetraviðmiðun í hverjum flokki.

Á næstu mánuðum áformar menntamálaráðuneytið að ljúka samningum við háskólana um þjónustu þeirra og verkefni. Ákvörðun um um fjárframlög vegna kennsluþáttarins í starfsemi þeirra verður byggð á fyrrnefndum reiknireglum en ekki framlög vegna rannsókna.