HRAFN SÆMUNDSSON
HAUSTBRÁÐ
Hann gekk einn á móti haustinu og sólin
sendi hlýja geisla niður til hans og hann þræddi
jökulröndina og droparnir vættu haustgróðurinn.
Og hann hlustaði á veikt gjálfur dropanna
sem féllu úr jökulröndinni og urðu
að seitlandi smásprænum sem runnu í lindina.
Og lindin var tær og speglaði haustsólina og
tók á móti dropunum án skilyrða því
lindin vissi að jökulvatnið var hreint og tært.
Og lindin og jökulvatnið mættust í lindinni
án orða í þögulli nánd og svalt vatnið
fléttaðist óbrotið yfir lindarbarminn á leið til hafsins.
Höfundurinn býr í Kópavogi.