FIMM LJÓÐ
UM ÍSLAND
EFTIR WANG RONGHUA SENDIHERRA KÍNVERSKA ALÞÝÐULÝÐVELDISINS Á ÍSLANDI
VILHJÁLMUR H. GÍSLASON ÞÝDDI
HUGHRIF ÚR FYRSTU
EYJAFERÐ MINNI
Í Vestmannaeyjum ótal fuglar fljúga
og fylla björgin kliði radda sinna
á meðan fiskinn hvíta vélar vinna
þá vinnsluhljóðin blandast ómi hinna.
Hraun og vikur jaðar þorpsins þekur
mér þessa spurning augnablikið vekur:
Hvert er það afl sem viðnám þetta veitti,
viljans múr, hann ásýnd þorpsins breytti?
Á JÖKLUM
Hve margir tindar hvíla í faðmi fanna
sem finnast hér í ríki okkar manna?
Á Langjökli ég söng af sannri gleði
og setti fjallakyrrðina að veði.
En vélsleðar í flokki framhjá þeystu
og freðna mjöll í skýjabólstra leystu
Allt í einu glöggum sá ég sjónum
hvar sameinaðist vetrarbrautin snjónum.
GULLFOSS LITINN AUGUM
Ég lagði bílnum þar sem grasið grær
og greindi í fjarska hvítan jökultind
en seinna þegar bíllinn bar mig nær
mér blasti við svo undurfögur mynd.
Bráðinn snjór í gljúfrum römmum rann
reginöskur iðukastsins drundi
uns flaumur vatnsins friðinn hljóða fann
í faðmi dalsins þar sem lygnt það undi.
Í þúsund ár það kalt og biturt beið
nú beisklega það tregar þessa gerð
að hafa ekki vaknað, lagt á leið
sem lindarvatn til mannanna, í ferð.
HUGRENNINGAR Á LEIÐ UM GÖNGIN
ARNÞÓR HELGASON OG STEINGRÍMUR ÞORBJARNARSON ÞÝDDU
Mér er ljúft að frétta
að á Íslandi er upprunninn
ógnarmikill dreki.
Í friðsæld hann hvíldi í hafsins djúpi
og hlýddi á öldugjálfrið.
Skrokkurinn teygðist
tíu þúsund skref.
Um iður hans var hundruðum
vagna ekið.
Hann lék sér að perlum
í hundruð ára
og þær fengu ekki framar
fangað huga hans.
Hann hendir gaman að tímanum
og hefur upp nýjan leik.
Aktu óhræddur
um kviðarhol hans
og vertu sigurviss.
HAMINGJUÓSKIR MEÐ SKIPULAG 29. ÓLYMPÍULEIKANNA Í EÐLISFRÆÐI
Nemendur sækja Ísland heim
til að etja kappi á Ólympíuleikum.
Gestrisnin, heit sem hraun
vermdi blóð þeirra.
Í draumi um sumarbjarta nótt
ómaði kórsöngur
og lúðraþytur við dagmál.
Hvernig gátu þeir sigrað
í slíkri æsingu?
Þeir urðu að halda ró sinni
og finna jafnvægi hugans.
Þótt prófin séu erfið
eru þeir ófjötraðir
með jöklasnjó í greipum sér.