ÍSTAK hf. hefur undirritað samning um kaup á Navision Financials ásamt veflausnum frá Streng hf. Hugbúnaðurinn verður keyrður á MS-SQL 7.0 gagnagrunni ásamt WebBroker, veflausn Strengs. Um er að ræða samofna heildarlausn hugbúnaðar þar sem viðurkenndar sérlausnir í verkbókhaldi, launa og tímaskráningu eru í fyrirrúmi. PricewaterhouseCoopers hf. annast þarfagreiningu, ferlagreiningu og verkstjórn ásamt Ístaki og Streng.
Í fréttatilkynningu segir að WebBroker frá Streng geri Ístaki kleift að skrá verkbókhald með lágmarkstilkostnaði hvaðan sem er með aðstoð netvafra. Skráningartæki getur verið venjulegur PC-biðlari, ferðavél, PalmPilot, WAP sími og/eða önnur tæki sem geta tengst Netinu.
Sigurjón Pálsson hjá Ístaki hf. segir að Strengur hafi verið valinn eftir útboð og ítarlega skoðun á fyrirtækjum og hugbúnaðarlausnum á íslenska markaðnum. Sérkerfi Strengs, þar á meðal veflausnir, ásamt reynslu Strengs höfðu úrslitaáhrif á val samstarfsaðila.
Að sögn Jóns Heiðars, sölustjóra Strengs hf., hefur Strengur undanfarið unnið að sérlausnum í forða- og verkbókhaldi. Um er að ræða heildarlausn allt frá starfsmannakerfi, tímaskráningu, viðverukerfi, forða- og verkbókhaldi, eignakerfi til launakerfis. Þegar launaútreikningur hefur átt sér stað er launafærslum skilað til baka í verkbókhald sem sýnir ávallt rétt kostnaðarverð sem tryggir rétt uppgjör verka.
Í notkun hjá 35.000 fyrirtækjum
Navision Financials er í dag í notkun hjá meira en 35.000 fyrirtækjum, á 22 tungumálum í 75 löndum. Navision Financials er með Windows 95/98/NT/2000, BackOffice, Office 97 og SQL Server 7.0 vottanir frá Microsoft. Allar lausnir í Navision Financials eru 2000 vottaðar og tilbúnar fyrir evru.Hjá Streng hf. starfa í dag 70 manns. Strengur hf. hefur selt og þjónustað Navision og Navision Financials síðan 1989.