ÞEIM sem hafa aðgang að Netinu fer enn fjölgandi, samkvæmt nýrri könnun Gallups. Þeim sem versla á Netinu fjölgar hins vegar ekki en 45% af þeim sem notuðu þá þjónustu keyptu bækur. Ríflega þrír af hverjum fjórum keyptu þær frá Amazon.com.
Alls hafa um 70% þátttakenda í könnuninni aðgang að Netinu, ríflega 54% hafa aðgang að Netinu á heimili og eru það um 5% fleiri en samkvæmt könnun í desember á síðasta ári. Aðgangur að Netinu er sem fyrr algengari meðal íbúa höfuðborgarsvæðisins en landsbyggðarfólks. Aðgangurinn er einnig tekjutengdur, því hærri sem tekjur einstaklinga eru því meiri líkur eru á því að hann hafi aðgang að Netinu.
Þeim sem versla á Netinu hefur ekki fjölgað síðastliðið ár samkvæmt könnun Gallup en þeir eru 23,4% í úrtaki könnunarinnar. Þeim fjölgaði hins vegar verulega árið þar á undan, úr 8,7% í apríl 1998 í 23,5% í apríl/maí 1999. Fólk á bilinu 25 til 34 ára verslar mest á Netinu. Borgarbúar versla meira en landsbyggðarfólk og sömuleiðis notar hátekjufólk Netið meira til kaupa á vöru en þeir sem lægri laun hafa.
Könnunin var unnin dagana 19. janúar til 6. febrúar síðastliðinn í gegnum síma. Svarendur voru 804 af 1200 manna tilviljunarúrtaki úr þjóðskrá á aldrinum 16 til 75 ára.