TRYGGINGAMIÐSTÖÐIN og Kvennadeild Slysavarnafélagsins á Akureyri hafa afhent Ívari Sigmundssyni forstöðumanni í Hlíðarfjalli 15 hjálma sem verða til afnota fyrir gesti skíðasvæðisins. Um er að ræða átak á landsvísu og verður alls á annað hundrað hjálma gefið á hin ýmsu skíðasvæði landsins, en 15 komu í hlut Skíðastaða.
Hjálmarnir er fyrir börn upp að 12 ára aldri og verða þeir lánaðir. "Við höfum fram til þessa ekki skyldað fólk til að nota hjálma á okkar skíðasvæði, en það fer hins vegar mjög í vöxt að börn séu með hjálma. Á Andrésar Andarleikunum er skylda að vera með hjálm og allir sem æfa skíði eru með hjálma. Þannig að þetta verður æ algengara," sagði Ívar.