Börnin okkar fá ekki þá kennsludaga sem lög kveða á um

FRAMUNDAN eru vetrarfrí í langflestum grunnskólum Reykjavíkur. Fyrir suma er þetta kærkomin nýjung, fyrir aðra fylgja þessu ýmis vandræði.

Við í stjórn SAMFOK, sambands foreldrafélaga og foreldraráða í skólum Reykjavíkur á grunnskólastigi, höfum meiri áhyggjur af því að verið sé að hafa af börnunum okkar þá kennsludaga sem þau eiga rétt á samkvæmt grunnskólalögum. Og það þá ekki í fyrsta skipti. Samkvæmt grunnskólalögunum eiga börn í grunnskólum hér á landi að fá, að lágmarki, 170 kennsludaga á hverju skólaári. Takið eftir því að hér er löggjafinn að tryggja lágmarksréttindi barnanna okkar, að sjálfsögðu mega dagarnir vera fleiri, það er á ábyrgð hvers sveitarfélags að taka ákvörðun um það.

Hvað eru kennsludagar?

Á undanförnum árum hafa börn í langflestum grunnskólum borgarinnar aðeins fengið 168 kennsludaga. Þetta hafa foreldrar ítrekað gert athugasemdir við. Ágreiningur hefur verið gerður um það hvað séu kennsludagar, m.a. hvort svokallaðir foreldraviðtalsdagar séu kennsludagar eða ekki. Til þess að fá úr þessu skorið hefur SAMFOK leitað til menntamálaráðuneytisins og beðið um úrskurði hvað þetta varðar. Áður en núverandi skólaár hófst hafði ráðuneytið fellt eina þrjá úrskurði um þetta atriði og þeir eru skýrir hvað þetta varðar: foreldraviðtalsdagar eru ekki kennsludagar. Þrátt fyrir þetta er börnum í Reykjavík enn boðið upp á skóladagatöl með einungis 168 kennsludögum. Og það þó þannig hagi til á þessu skólaári, að frá 1. september til 31. maí séu 178 virkir dagar, þremur virkum dögum meira en vanalega ( virkir dagar = fjöldi daga - frídagar)

Hvernig er þessu skólaári skipt niður? Í stórum dráttum er þetta eins og fram kemur í þessari töflu:

Skipting skólaársins

Fj. virkra daga178

Fj.samstarfsdaga kennara5

Fj. foredraviðtalsdaga2

Fj. vetrarfrísdaga3

Fj. kennsludaga 168

En hverjir bera ábyrgð á þessu? Í grunnskólalögunum segir eftirfarandi: Í hverju skólahverfi skal vera skólanefnd sem fer með málefni grunnskóla eftir því sem lög og reglugerðir ákveða og sveitarstjórn eða sveitarstjórnir kunna að fela henni. Skólanefnd skal sjá um að öll skólaskyld börn í skólahverfinu njóti lögboðinnar fræðslu. Hún skal staðfesta áætlun um starfstíma nemenda ár hvert og fylgjast með framkvæmd náms og kennslu í skólahverfinu. Í sveitarfélögum þar sem skólahverfi eru fleiri en eitt skal áætlun um starfstíma nemenda jafnframt staðfest af viðkomandi sveitarstjórn. Í Reykjavík hafa menn ákveðið að borgin skuli vera eitt skólahverfi og einungis ein skólanefnd starfandi. Skólanefnd grunnskólanna í Reykjavík er Fræðsluráð Reykjavíkur. Samkvæmt þessu ber það ábyrgð á að börnin okkar fái ekki færri en 170 kennsludaga ár hvert. Þessu hlutverki sínu hefur fræðsluráð brugðist á undanförnum árum.

Stutt skólaár hefur neikvæð áhrif

Skólamenn eru yfirleitt sammála um að stutt skólaár hafi neikvæð áhrif á námsárangur barnanna okkar. Til munu vera rannsóknir sem sýna fylgni þessara atriða, þ.e. því styttra skólaár, því lakari námsárangur. Eins og áður sagði eru virkir dagar á þessu skólaári óvenjulega margir eða 178 miðað við 175 í venjulegu ári. Fræðsluráð Reykjavíkur hafði því gott tækifæri nú til að gera vel við börn í grunnskólum borgarinnar og hafa kennsludagana fleiri en það lágmark sem grunnskólalögin kveða á um.

Fræðsluráði hefur verið kunnugt um það lengi í hvað stefndi þetta skólaár. Því hafa borist umsagnir foreldraráða fyrr í vetur um skóladagatöl og skólanámskrár þar sem vakin hefur verið athygli á þessu atriði. Á síðasta fræðsluráðsfundi, sem haldinn var 21. febrúar, lagði undirritaður fram tillögu um að skólastjórum borgarinnar verði sent bréf frá fræðsluráði þar sem fram komi að :

1. Lágmarksfjöldi kennsludaga samkvæmt grunnskólalögunum er 170.

2. Samkvæmt úrskurði menntamálaráðuneytisins eru starfsdagar kennara og foreldraviðtalsdagar ekki kennsludagar.

3. Fræðsluráð beinir því til skólastjóra að þeir endurskoða skóladagatöl skólanna í þessu ljósi, og felli niður vetrarfrí þar sem það á við svo fjöldi kennsludaga verði ekki færri en 170.

Formaður fræðsluráðs, Sigrún Magnúsdóttir, bar ekki upp tillöguna til afgreiðslu á þeim fundi og því er ekki vitað hvaða afgreiðslu hún fær.

Það hefur heyrst að kjarasamningar Reykjavíkurborgar við starfsfólk skólanna komi í veg fyrir að hægt sé að uppfylla lágmarksákvæði laganna um fjölda kennsludaga. SAMFOK telur það ekki vera mál sem það hefur bein afskifti af. Við göngum útfrá því að borgin gangi þannig frá sínum samningum við sitt starfsfólk að það fái greitt fyrir þá vinnu sem það þarf að vinna til að uppfylla sínar vinnuskyldur sem síðan hljóta að taka mið af þeim lögum sem um málið gilda.

Eins og áður sagði er áætlað að svokölluð vetrarfrí verði í langflestum grunnskólum borgarinnar dagana 6, 7 og 8 mars. Ætlar Fræðsluráð að grípa til aðgerða fyrir þann tíma?

Hvernig ætlar formaður fræðsluráðs Reykjavíkur að tryggja að börnin okkar fái þann lágmarksfjölda kennsludaga sem lögin kveða á um?

ÓSKAR ÍSFELD

SIGURÐSSON,

formaður SAMFOK og áheyrnarfulltrúi foreldra í fræðsluráði

Reykjavíkur.