ÁVÖXTUN Séreignalífeyrissjóðsins, sem rekinn er af Búnaðarbankanum, var góð á árinu 1999, að því er fram kemur í tilkynningu frá sjóðnum.

ÁVÖXTUN Séreignalífeyrissjóðsins, sem rekinn er af Búnaðarbankanum, var góð á árinu 1999, að því er fram kemur í tilkynningu frá sjóðnum. Í byrjun síðasta árs bauð Séreignalífeyrissjóðurinn sjóðfélögum upp á þrjár mismunandi ávöxtunarleiðir sem eru settar saman af mismunandi verðbréfasöfnum sem eru ólík varðandi fjárfestingastefnu og áhættu. Ávöxtunarleiðirnar eru sniðnar að þörfum mismunandi aldursskeiða þar sem ungt fólk getur tekið meiri áhættu en þeir sem eldri eru með von um hærri ávöxtun. Á árinu 1999 var nafnvöxtun ávöxtunarleiðanna þannig að nafnávöxtun þeirrar leiðar sem hentar þeim sem eru yngri en 40 ára var 33,5%, ávöxtunarleið þeirra sem eru á aldrinum 40-59 ára var 24,3% og ávöxtunarleið þeirra sem eru 60 ára og eldri var 16,4%.

Launagreiðendur sem greiða viðbótarframlög fyrir starfsmenn sína í séreignalífeyrissparnað eiga nú kost á að greiða þau í Lífeyrisauka Búnaðarbankans. Jafnframt geta launþegar eftir sem áður greitt 2% frjálst viðbótariðgjald af launum sínum skattfrjálst í Lífeyrisaukann. Í Lífeyrisaukanum má velja bæði innlenda og erlenda hlutabréfasjóði og skipta sparnaðinum á milli þeirra í hvaða hlutföllum sem er.

Í byrjun þessa árs setti Séreignalífeyrissjóðurinn á laggirnar tryggingadeild sem tryggir þeim sjóðfélögum lágmarkstryggingavernd sem greiða lögbundið 10% lágmarksiðgjald í sjóðinn. Lágmarkstryggingavernd samanstendur af ellilífeyri til æviloka, örorkulífeyri og maka- og barnalífeyri. Hluti 10% lágmarksiðgjalds rennur nú í tryggingadeildina en hluti áfram í séreignadeild sjóðsins.