Evrópufrumsýning var hér á landi á nýrri tölvu frá Gateway á dögunum. Gísli Árnason kynnti sér Gateway Profile, en aðal vélarinnar er, að hans mati, það að hún er lítið stærri en þunnur kristalsskjár.

ÞRÁTT FYRIR þær miklu breytingar sem orðið hafa á afkastagetu tölva á síðasta áratug hefur útlit þeirra og aðferðir við að setja saman tölvur lítið breyst frá því snemma á níunda áratugnum. T.a.m. er oft hægt að notast við fimmtán ára gamlar mýs og lyklaborð við nýjustu tölvur og eru kassarnir sem geyma tölvubúnaðinn afar áþekkir því sem tíðkaðist þegar IBM framleiddi fyrstu einkatölvurnar fyrir um tuttugu árum. Helstu breytingarnar sem orðið hafa eru þær að umfang tölvanna hefur aukist, skjáir eru stærri og kassarnir hafa einnig stækkað því pláss þarf að vera fyrir skjáhraðla, hljóðkort og annan aukabúnað.

Ýmsar tilraunir hafa verið gerðar til að brjóta upp hönnun einkatölvunnar, ein sú þekktasta í seinni tíð er líklega iMac-tölvan en enn hefur þó engin slík hönnun náð að festa sig í sessi. Gateway sem er meðal stærstu tölvuframleiðenda gaf nýlega út Gateway Profile-tölvuna en Aco, umboðsaðili Gateway á Íslandi hélt Evrópufrumsýningu á vélinni fyrir stuttu.

Vélbúnaðinum komið fyrir í skjánum og fætinum

Aðal Profile-vélarinnar er að hún er í heild lítið stærri en þunnur skjár með kristalupplausn en slíkir skjáir eru að verða æ algengari sýn, t.d. í bönkum og á skrifstofum. Þykkt hennar er lauslega reiknað rúmar tvær þumalbreiddir en vélbúnaðinum er komið fyrir í skjánum og fætinum. DVD- og disklingadrifi er haganlega komið fyrir í hliðunum og hnappar til að ræsa tölvuna og stilla skjáinn eru staðsettir á besta stað fyrir neðan skjáglerið. Aðeins fáeinar mínútur tekur að setja upp og ræsa vélina og greinilegt er að ekki er ætlast til að við hana sé átt eftir uppsetningu.

Allt er gert til að sem minnst fari fyrir vélinni og umbúnaði, spjald aftan á henni er fjarlægt til að tengja rafmagn, net og annan útbúnað og sett saman í klemmu, þegar spjaldið er komið aftur á sinn stað stendur aðeins út úr henni þéttur vöndull af köplum stað þess að þeir séu á víð og dreif um bak vélarinnar líkt og á flestum tölvum.

550 megariða örgjörvi

Gagnslítið væri að eiga vél á borð við Gateway Profile ef hún gæti ekki sinnt öllum hefðbundnum hlutverkum einkatölvu. Hún er enda búin 550 megariða örgjörva, þrettán gígabæta hörðum diski og 64 megabæta vinnsluminni. Það ætti að reynast nægilegt reikniafl til allra verka en þó hefði mátt vera meira vinnsluminni í henni þar sem hugbúnaður verður stöðugt þyngri í vöfum, t.a.m. er ekki æskilegt að keyra Windows 2000-stýrikerfið með minna en 96 megabæta vinnsluminni ef á að ná fullum afköstum. Innbyggt í tölvunni er hljóðkort, skjákort, mótald og netkort, auk þess eru á henni öll tengi sem þarf til að tengja utanáliggjandi vélbúnað á borð við prentara og auk þeirra fjögur USB tengi. Það sem kemur þó hvað mest á óvart er það hvað skjárinn og skjákortið ráða vel við erfið verkefni á borð við leiki og að spila kvikmyndir af DVD-diskum. Vélin er búin öflugu skjákorti og vandræðalaust gekk að setja upp og spila reynsluútgáfu Quake III-leiksins sem reynir nokkuð á skjákort. Kristalskjáir á fartölvum hafa löngum verið hægir og því hentað illa til leikja en greinilegt er að þeim galla hefur verið útrýmt.

Ekki með öllu gallalaus

Tölvan er þó ekki með öllu gallalaus, þegar svo smá tölva er smíðuð verða einhvers staðar að koma til málamiðlanir og þrennt pirraði einkum þegar tölvan var reynd. Hátalarar sem fylgja tölvunni hljóma illa, við fyrstu tilhugsun er það e.t.v. ekki svo mikilvægt en þegar tölva er keypt með það að sjónarmiði að lítið fari fyrir henni og ekki þurfi aukabúnað við hana skiptir máli að slíkir hlutir séu í lagi. Hátalarar rýnis sem fengust fyrir flatbökuverð hljómuðu mun betur við samanburð.

Sérstakan geisladisk frá Gateway þarf til að setja upp stýrikerfi á tölvuna og hjálpar sá sem fylgir við uppsetningu Windows '98 og '95 en viðbúið er að eigendur lendi í vandræðum ef setja á inn annað stýrikerfi, t.a.m. Windows Me, sem út kemur síðar á árinu, eða Linux. Fótur vélarinnar mætti einnig vera stærri en hann er lítill og vélin létt svo hún er nokkuð völt.

Gateway Profile er vænlegur kostur fyrir þá sem lítið vinnupláss hafa eða vilja að það líti vel út. Einnig ætti vélin að henta vel fyrirtækjum sem vilja smekklegar og fyrirferðarlitlar tölvur, t.d. á stöðum sem viðskiptavinir sækja, í afgreiðslum, bönkum o.þ.h. Það er í raun merkilegt að í tölvubyltingunni sem orðið hefur á síðustu árum hafi lítið markvert breyst hvað varðar útlitshönnun þeirra en Gateway Profile er vel heppnað skref í rétta átt að meðfærilegri og smærri borðtölvum.