YFIRVÖLD í Bretlandi ákærðu í gær rithöfundinn Jeffrey Archer fyrir að hafa beðið vin sinn um að bera ljúgvitni í meiðyrðamáli sem hann höfðaði gegn dagblaðinu Daily Star fyrir 13 árum. Archer, sem lengi var í miklum metum hjá Íhaldsflokknum, var ákærður fyrir meinsæri og fyrir að hafa hindrað framgang réttvísinnar, að því er talsmaður Scotland Yard greindi frá. Hneykslismál Archers náði hámarki í nóvember á síðasta ári er hann viðurkenndi að hafa beðið vin sinn um að bera ljúgvitni um samband sitt við vændiskonu. Kom játning Archers í veg fyrir framboð hans í kosningunum um embætti borgarstjóra Lundúna sem fram fóru í vor.
Réttur til einkalífs varinn
ÞEKKTIR einstaklingar eru víða taldir almannaeign sem ljósmyndarar og fjölmiðlar hafi rétt á að elta. Siðanefnd norska fjölmiðlasambandsins varði hins vegar nýlega rétt krónprinsins Hákonar til einkalífs eftir að Dagbladet, eitt stærsta dagblað Noregs, birti á forsíðu mynd af prinsinum kyssa kærustu sína, Mette-Marit Tjessem Hoiby, í afmælisveislu sinni."Áfrýjunarnefndin getur ekki fallist á að afmæliskoss frá kærustu teljist mikilvægur fyrir þjóðfélagið," sagði í dómi siðanefndar, sem taldi Dagbladet brjóta gegn siðareglum fjölmiðla með myndbirtingunni.
Sotheby's til sölu?
SVO kann að fara að Alfred Taubman, sem á meirihluta í Sotheyby's-uppboðsfyrirtækinu, selji hlut sinn sem metinn er á einar 309 milljónir dollara, eða tæpa 25 milljarða króna. Taubman sagði af sér embætti sem stjórnarformaður fyrirtækisins í febrúar sl. vegna rannsóknar á meintu verðlagssamráði Christie's og Sotheby's, sem ráða í sameiningu yfir um 95% uppboðsmarkaðarins.
Til baka
Leita í greinasafni
Prenta grein
