AUSTUR-TÍMORSKA frelsishetjan Jose Alexandre "Xanana" Gusmao batt í gær enda á margra mánaða óvissu með því að tilkynna að hann hygðist bjóða sig fram til forseta landsins þegar það fær fullt sjálfstæði á næsta ári.
Gusmao er fyrrverandi skæruliðaleiðtogi og nýtur gífurlegra vinsælda á Austur- Tímor, sem hann átti þátt í að frelsa undan 24 ára kúgunarstjórn Indónesa. Indónesískar hersveitir tóku hann höndum 1992 og var hann pólitískur fangi í Jakarta uns Austur-Tímorar samþykktu í atkvæðagreiðslu undir stjórn Sameinuðu þjóðanna 1999 að segja skilið við Indónesíu.
Vildi frekar vera bóndi eða ljósmyndari
Fram til þessa hefur Gusmao oft sagt að hann hafi engan áhuga á að verða fyrsti þjóðhöfðingi landsins. Hefur hann sagst frekar myndu vilja verða bóndi eða ljósmyndari, og að fyrrverandi uppreisnarmaður geti aldrei orðið að góðum forseta. En á fréttamannafundi í gær tilkynnti hann að aðrir stjórnmálamenn í landinu hefðu beitt sig þrýstingi og hann hefði látið undan.Eftir fjóra daga verður kosið til 88 manna samkomu sem leggja á drög að stjórnarskrá, ákveða með hvaða hætti stjórnarfarið í landinu verði og hvernig kjör forseta og þingmanna fari fram.
Austur-Tímor hafði verið portúgölsk nýlenda í um 400 ár þegar Indónesar hertóku landið 1975. Indónesískir hermenn létu greipar sópa um landið eftir atkvæðagreiðsluna 1999 og síðan hefur landið notið sérstakrar verndar Sameinuðu þjóðanna.
Dili. AP.
Til baka
Leita í greinasafni
Prenta grein
