SEX mánaða uppgjör Baugs hf. er yfir væntingum greiningardeildar Íslandsbanka, að sögn Almars Guðmundssonar, forstöðumanns deildarinnar. Baugur hf. skilaði 373 milljóna króna hagnaði á fyrstu sex mánuðum ársins, en 291 milljón á sama tíma í fyrra, eins og fram kom í Morgunblaðinu í gær.
"Ekki verður séð annað en að rekstur Arcadia eigi eftir skila félaginu viðunandi arði til skemmri tíma, auk þess sem athyglisvert verður að fylgjast með framvindunni hjá Bonus Stores í Bandaríkjunum en því verkefni fylgir mikil áhætta. Miklu skiptir fyrir félagið að boðað kostnaðaraðhald skili sér á síðari árshelmingi," segir Almar.
"Velta félagsins á öðrum ársfjórðungi var meiri en gert var ráð fyrir í okkar spá. Uppgjörið litast hins vegar nokkuð af auknum kostnaði hjá félaginu. Annars vegar hafði snögg gengislækkun krónunnar sterkari neikvæð áhrif á álagningu en við gerðum ráð fyrir, álagning í vörusölu var 24,6% en var 25,1% í fyrra. Aftur á móti voru laun og annar rekstrarkostnaður hærri en við gerðum ráð fyrir en það skýrist m.a. af umfangsmiklum uppbyggingarverkefnum hjá félaginu," segir Almar Guðmundsson hjá Íslandsbanka.