Reykjavík - Hjá fasteignasölunni Fold er nú í sölu einbýlishús að Hrísateigi 41 í Reykjavík. Þetta er steinhús, byggt 1967 og á tveimur hæðum. Alls er húsið 285 ferm., þar af er innbyggður bílskúr 22 ferm.
"Þetta er stórglæsilegt hús á frábærum stað, eitt af fáum einbýlishúsum sem eftir eru í Laugarnesinu," sagði Ævar Dungal hjá Fold.
"Í raun er þetta tveggja íbúða hús. Aðalíbúðin er 212 ferm., en minni íbúðin er 73 ferm. og er hún á jarðhæð/kjallara. Húsið hefur allt verið mikið endurnýjað síðustu sex árin og ekkert til sparað.
Það er steniklætt að utan með nýlegum gluggum og gleri að mestum hluta og nýlegu þaki. Garðurinn er hellulagður með upphituðu bílastæði og afgirtum timbursólpalli.
Minni íbúðin er með sér inngangi en einnig er möguleiki að hafa innangengt í aðalíbúð. Í henni eru tvö svefnherbergi og stofa, mætti mögulega nýta sem þrjú útleiguherbergi með sameiginlegu eldhúsi og snyrtingu. Í eldhúsinu er hvít beykiinnrétting, baðherbergið er flísalagt í hólf og gólf og með sturtu, en geymsla er þar fyrir innan.
Á aðalhæð er komið inn í flísalagða forstofu, en þaðan er gengið inn í stórar og bjartar stofur með góðri lofthæð. Á gólfum er gegnheilt jatoba-parket. Eldhúsið er dúklagt með endurbættri innréttingu.
Nokkur þrep eru upp í svefnálmu. Þar er stórt hjónaherbergi með nýlegum fataskáp, þrjú svefnherbergi en gætu verið fjögur þar sem búið er að sameina tvö lítil í eitt stórt. Baðherbergið er flísalagt í hólf og gólf með hornbaðkari, fallegri innréttingu með tveimur vöskum í borði, sturtu og gufuklefa.
Stór sjónvarpsstofan er parketlögð með arni og útgangi út á afgirtan timbursólpall. Þvottahús er í kjallara og innbyggður bílskúr, en inn af honum er stór geymsla. Áhvílandi eru góð langtímalán um 12 millj. kr. Ásett verð er 29,7 millj. kr."
Til baka
Leita í greinasafni
Prenta grein
