EMBÆTTI húsameistara gerði á sínum tíma tillögur að stækkunum og viðbyggingum við Arnarhvol og gamla Hæstaréttarhúsið sem taka mið af byggingastíl Guðjóns Samúelssonar.

EMBÆTTI húsameistara gerði á sínum tíma tillögur að stækkunum og viðbyggingum við Arnarhvol og gamla Hæstaréttarhúsið sem taka mið af byggingastíl Guðjóns Samúelssonar. Í tveimur mismunandi tillögum er gert ráð fyrir því að hæstaréttarhúsið sé nýtt sem miðja fyrir byggingu, sem nær annars vegar út að íþróttahúsi Jóns Þorsteinssonar og hins vegar alla leið út að Skuggasundi.

Að sögn Garðars Halldórssonar, fyrrverandi húsameistara ríkisins, voru tillögurnar gerðar fyrir um tíu árum fyrir Stjórnarráðið þegar fyrirséð var að Hæstiréttur myndi flytja sig um set. "Þá gerðum við nokkrar athuganir á þessum viðbyggingarmöguleikum og tillögurnar gengu meðal annars út á að stækka Arnarhvol með því útliti sem hann er með í dag til þess að framlengja byggingarstíl Guðjóns Samúelssonar. Hluti af þeim tillögum byggðist á því að nota Hæstaréttarhúsið en rífa Jóns Þorsteinssonarhúsið" segir Garðar.

Á teikningunum má sjá hvernig hæstaréttarhúsið, sem Gujón Samúelsson teiknaði einnig, skapar ákveðna miðju lengjunnar og að sögn Garðars var hugmyndin sú að hafa inngang þar. "Við ætluðum að nota framhliðina þar sem svona áherslu í fletinum og halda svo áfram með eitthvað svipað og Arnarhvol hinum megin við þá miðju."

Setti ekki enda á húsið

Hann segir ekki vitað hvort Guðjón hafi sjálfur hugsað sér þetta framhald af Hæstaréttarhúsinu. "Arnarhvoll eins og hann er í dag var byggður í tveimur áföngum og þess vegna framlengir Guðjón Arnarhvol sjálfur einu sinni því austurendinn sem er meðfram Lindargötu var byggður síðar en sá hluti sem er vestar. Svo teiknar hann Hæstarétt en við höfum nú ekki rekist á teikningar frá honum sjálfum sem sýna framhald af því. Það eru hugmyndir sem komu frá okkur hjá embætti húsameistara á seinni stigum.

Aftur á móti vitum við að hann endar Hæstaréttarhúsið með branngafli þannig að hann setur ekki enda á húsið. Þetta þýðir að hann reiknar með því sem arkitektar kalla randbyggingu áfram, þ.e.a.s. að þetta séu ekki sjálfstæð hús heldur haldi áfram að stækka, annaðhvort með sama formi eða öðru formi. Það er ekkert óeðlilegt að þetta form Guðjóns bara haldi áfram og það myndi styrkja Arnarhvol sem slíkan útlitslega. En það má ekki skilja það þannig að við höfum fundið einhverja tillögu frá Guðjóni um það en við vorum kannski að ímynda okkur að þetta myndi Guðjón hafa gert ef honum hefði verið falið að stækka það."

Ekki til skoðunar núna

Ólafur Davíðsson, ráðuneytisstjóri í forsætisráðuneytinu, kannaðist við þessar hugmyndir en sagði þær ekki hafa verið til skoðunar í tengslum við nýtt deiliskipulag stjórnarráðsreitsins. "Við höfum í rauninni ekki verið að skoða nákvæmlega hvernig útlitið eða nýtingin yrði akkúrat á þessum reit vegna þess að við höfum alfarið verið að hugsa um Sölvhólsgötuna. Það er í rauninni það eina sem hefur verið rætt um og undirbúið til framkvæmdar vegna þess að það verður fyrsti áfanginn í því sem gert verður á reitnum."

Hann segir tillögurnar sem liggja fyrir ekki útiloka þessa tíu ára gömlu útfærslu. "En ég held að þessar hugmyndir séu alfarið barn síns tíma. Þá var til dæmis ekki búið að gera neitt deiliskipulag. Eins var verið að velta fyrir sér hvernig mætti nýta þetta með eða án húss Jóns Þorsteinssonar en nú liggur fyrir í deiliskipulaginu að það geti farið."