Englendingar eiga vart orð til lýsa frábærum árangri sinna manna á knattspyrnuvellinum en Englendingar niðurlægðu Þjóðverja á ólympíuleikvanginum í München á laugardagskvöldið. Þetta var fyrsti sigur enska landsliðsins á því þýska í Þýskalandi frá 1965.

Englendingar eiga vart orð til lýsa frábærum árangri sinna manna á knattspyrnuvellinum en Englendingar niðurlægðu Þjóðverja á ólympíuleikvanginum í München á laugardagskvöldið. Þetta var fyrsti sigur enska landsliðsins á því þýska í Þýskalandi frá 1965.

Enska liðið fór hreinlega á kostum, skoraði fimm mörk á móti einu og allt í einu eygja þeir möguleika á komast upp fyrir Þjóðverja í baráttunni um efsta sætið í 9. riðli. Í Þýskalandi ríkir mikil sorg og fjölmiðlar þar í landi vanda sínum mönnum ekki kveðjurnar. "Sögulegt afhroð og stærsta slysið í sögu þýskrar knattspyrnu" segir til að mynda í Bild am Sonntag.

Enska pressan er nánast á einu máli og segir úrslitin þau bestu í sögu enska landsliðsins og er þá talinn með úrslitaleikur Englendinga og V-Þjóðverja um heimsmeistaratitilinn árið 1966 þegar Englendingar fögnuðu sigri, 3:2 í sögulegum leik.

Fimm eitt fyrir Liverpool segja stoltir stuðningsmenn "rauða hersins" en liðsmenn Liverpool sáu um að skora öll mörkin. Michael Owen skoraði þrennu og þeir Steven Gerard og Emile Heskey hvor sitt markið.

Bobby Robson, fyrrum þjálfari enska landsliðsins og núverandi knattspyrnustjóri Newcastle, efast ekki um að stórsigurinn á Þjóðverjum séu bestu úrslitin í sögu enska landsliðsins.

"Þetta var stórkostlegur leikur hjá liðinu og að vinna 5:1 í München eftir að hafa lent undir er mögnuð frammistaða. Ég er ekki í nokkrum vafa að bestu leikmenn enska liðsins geta gengið beint inn í bestu félagslið heims. Ég sé fyrir mér Steven Gerrard hjá Barcelona, David Beckham mundi falla vel inn í lið Juventus, Paul Scholes mundi sóma sér vel í Real Madrid og svona gæti ég haldið áfram," segir Robson.

Gerard Houllier, knattspyrnustjóri Liverpool, var hrærður yfir frammistöðu sinna manna í enska liðinu.

"Þetta er kvöld sem stuðningsmenn Liverpool koma til með að minnast með stolti og öll enska þjóðin getur verið stolt af þessari frábæru frammistöðu. Í dag eiga Englendingar frábæran efnivið. Það er mikið af leikmönnum á aldrinum 18-23 ára sem eru komnir í hóp með þeim allra bestu og ég sé fyrir mér að enska liðið eigi eftir að láta verulega að sér kveða í framtíðinni," sagði Houllier.

Kollegi Houlliers, Arsene Wenger hjá Arsenal, tók í sama streng.

"Ég var uppnuminn af frammistöðu enska landsliðsins í þessum leik og ég hef trú á að Englendingar geti farið alla leið og hampað heimsmeistaratitlinum í Japan og S-Kóreu næsta sumar. Ég sagði Þjóðverjum fyrir leikinn að ég teldi að Englendingar myndu sigra en mig óraði ekki fyrir því að það yrði jafn afgerandi hátt. Enska liðið er fullt af ungum og stórefnilegum leikmönnum og í fremstu víglínu hafa þeir Michael Owen sem er svo sannarlega á skotskónum þessa dagana," sagði Wenger.

Öll spjót beindust að Micheal Owen eftir leikinn enda lék hann þýsku varnarmennina mjög grátt og skoraði þrjú glæsileg mörk.

Owen brá sér inní búningsherbergi Þjóðverja eftir leikinn og náði að telja þýska landsliðsmanninn Jörg Böhme á að láta sig hafa keppnistreyjuna sem Owen notaði í leiknum. Owen segir á heimasíðu sinni að hann hafi ekki áttað sig á því fyrr en eftir leikinn að hann hafi látið treyjuna frá sér. "Ég bauð Böhme aðra treyju sem var ónotuð, hann brást vel við og skildi vel að ég vildi fá hana tilbaka. Ég gat ekki hugsað mér að landsliðsbúningurinn sem ég skoraði þrennu fyrir England í myndi enda hjá þýskum leikmanni," segir Owen en hann tryggði sér einnig knöttinn sem notaður var í leiknum. "Mér líður vel þessa dagana og sjálfstraustið er mikið - mér finnst ég geta skorað í hvert sinn sem ég kem við knöttinn," sagði Owen.