SKEMMTIFERÐASKIPIÐ Evrópa kom inn á Skjálfandaflóa fyrir skömmu og létti akkerum skammt fyrir utan höfnina á Húsavík. Skipið sem skráð er í Nassau á Bahamaeyjum er það stórt að það kemst ekki að bryggju í Húsavíkurhöfn. Skipið var annað tveggja skemmtiferðaskipa sem boðað höfðu komu sína til Húsavíkur í sumar.
Fljótlega hófu léttabátar skipsins að flytja farþegana í land þar sem farið var með þá í skoðunarferðir. Um sjötíu manna hópur farþega af skipinu fór þó ekki í þessar hefðbundnu skoðunarferðir og reyndar ekki strax í land. Þegar að flotbryggjunni kom fór það beint um borð í Náttfara og haldið var til hafs á ný í þeim tilgangi nú að skima eftir hvölum. Það var því töluverð umferð báta um höfnina því auk léttabátanna og hvalaskoðunarbátanna voru fiskibátar af ýmsum stærðum á ferðinni.
Þeir voru margir sem nýttu sér góða veðrið þennan dag og sigldu fram fyrir höfnina á bátum sínum og skoðuðu skemmtiferðaskipið. Í leiðinni reyndu sumir hverjir að ná sér í ýsu í soðið en hún hefur verið að gefa sig á stöngina að undanförnu. Fréttaritari brá sér út á flóann til myndatöku, farið var með Sigurgeir Smára Harðarsyni, skipstjóra á Náttfara ÞH 6. Þess ber að geta að Náttfari ÞH 6 er ekki sá Náttfari sem getið var um hér að framan og notaður er til siglinga með fólk á hvalaslóðir heldur smábátur sem notaður er lítillega til veiða í tómstundaskyni.
Til baka
Leita í greinasafni
Prenta grein
