YFIR 100 laxar, margt boltafiskar, hafa í haust haft dvalarstað hjá Norðurlaxi en þeir eru notaðir í ræktunarstarfið og koma til með að gefa af sér mikinn fjölda seiða.
Þegar margir laxar eru saman í einni tjörn er mikið buslað þegar farið er að taka hrognin og stundum er erfitt að hafa tak á stórum sporðum.
Þá daga lætur Jón Benediktsson, stjórnarformaður Norðurlax, sig ekki vanta enda vanur að láta fiskinn ekki renna úr greipum sér. Á myndinni má sjá Jón ásamt Aðalsteini Haraldssyni, starfsmanni laxeldisstöðvarinnar, með einn yfir 20 pund sem mun vonandi skila nokkrum stórlöxum.
Norðurlax selur seiði bæði í ár og hafbeitarstöðvar fyrir utan að vera ræktunarstöð fyrir Laxá í Aðaldal. Seiðasleppingar hafa aukist á undanförnum árum í þeim tilgangi að auka endurheimtur. Í aflanum á síðasta sumri var mikið af merktum fiski sem bendir til þess að ræktunarstarfið skili góðum árangri.
Til baka
Leita í greinasafni
Prenta grein
