Endurmenntunarstofnun Háskóla Íslands og Þjóðleikhúsið standa sameiginlega að námskeiði um gamanleiki og hefst það 4. febrúar. Undanfarin ár hefur Þjóðleikhúsið í samvinnu við EHÍ staðið fyrir námskeiðum um leikhús og leikbókmenntir í tengslum við sýningar leikhússins. Að þessu sinni í tengslum við farsann Allir á svið! eftir Michael Frayn í þýðingu og staðfærslu Gísla Rúnars Jónssonar sem Þjóðleikhúsið sýnir í samstarfi við Grínara Hringsviðsins.
Á námskeiðinu verður fjallað um gamanleikinn í sínum ólíku myndum. Fyrirlesarar hafa allir víðtæka reynslu af því að setja á svið, leika, þýða og semja gamanefni. Auk þess að miðla af reynslu sinni munu þeir taka fyrir sértæk viðfangsefni; Árni Ibsen mun fjalla um sögu og þróun gamanleiksins, Karl Ágúst Úlfsson mun fjalla um uppbyggingu hefðbundinna gamanleikja og Gísli Rúnar Jónsson, leikstjóri Allir á svið!, mun fjalla um sviðsetningu gamanleikja. Áhorfendur sjá sýningu á Allir á svið! í Þjóðleikhúsinu og er leikhúsmiði innifalinn í námskeiðsgjaldi. Námskeiðinu lýkur með umræðum með fyrirlesurum og tveimur leikurum, þeim Sigurði Sigurjónssyni og Eddu Björgvinsdóttur, en þau leika í sýningu Þjóðleikhússins.
Umsjón með námskeiðinu af hálfu Þjóðleikhússins hefur Melkorka Tekla Ólafsdóttir leiklistarráðunautur.
Til baka
Leita í greinasafni
Prenta grein
