Af hverju er guð til?

BÓKIN Afhverju Hvernigson og regnboginn eftir Elínu Arnar kom nýverið út hjá bókaforlaginu Sölku. Þar segir frá Afhverju sem býr í Spurningalandi og vinkonu hans, Afþvíbara. Á dögunum heimsótti Elín Arnar sjö og átta ára gömul börn í Breiðagerðisskóla og Varmárskóla. Hún las söguna fyrir þau og síðan spunnust umræður um nauðsyn þess að spyrja og vera opin fyrir því sem er að gerast í kringum okkur. Börnin unnu verkefni úr bókinni og máluðu síðan stóran regnboga sem þau fylltu af spurningum. Þar mátti m.a. sjá eftirfarandi hugleiðingar: "Af hverju hneggja hestar og hvers vegna stríða krakkar sumum en ekki öðrum? Af hverju er guð til og til hvers í ósköpunum þarf ég að vera í skóla?!" Ætlunin er að heimsækja fleiri skóla á næstunni.