ÍSLANDSBANKI hf. hefur gert hluthöfum í Fjárfestingarfélaginu Straumi hf. tilboð um kaup á hlutabréfum í félaginu á genginu 3,15. Frestur til að taka tilboðinu er til 6. mars næstkomandi. Tilboðið miðast við eignarhlut hluthafa í hlutaskrá félagsins við lok dags 13. febrúar 2003. Tilboðið er gert með vitund og í samráði við stjórnendur Straums. Eignarhlutur Íslandsbanka í Fjárfestingarfélaginu Straumi hf. er 25,34%. Frá þessu var greint í tilkynningu til Kauphallar Íslands síðastliðinn föstudag.
Margir nýta skattaafslátt
Í bréfi sem Íslandsbanki mun senda hluthöfum, og fylgdi með tilkynningunni til Kauphallarinnar, kemur fram að fjölmargir viðskiptavinir bankans hafi keypt hlutabréf í Hlutabréfasjóðnum hf., m.a. til að nýta tækifæri til skattaafsláttar.Þar sem árið 2002 hafi verið síðasta árið sem einstaklingar hafi getað nýtt sér hlutabréfakaup til skattalækkunar hafi forsendur fyrir sérstökum hlutabréfasjóðum í formi hlutafélaga breyst. Hlutverki Hlutabréfasjóðsins hafi verið breytt og hann gerður að fjárfestingarfélagi og nafni sjóðsins hafi jafnframt verið breytt í Fjárfestingarfélagið Straum. Segir í bréfinu að í ljósi breytinga á starfsemi félagsins kunni upphaflegar forsendur hlutabréfaeignar einstaklinga í Straumi að hafa breyst. Því geri Íslandsbanki hluthöfum tilboð um kaup á hlutabréfum þeirra í Straumi.
Einnig var greint frá því í tilkynningu til Kauphallar Íslands að Fjárfestingarfélagið Straumur hefði keypt eigin bréf, 135 milljónir króna að nafnverði, á verðinu 3,15. Eftir kaupin er eignarhlutur Straums 9,45%, eða 265 milljónir að nafnverði.