TAP Skýrr hf., sem gert er upp ásamt dótturfélaginu Teymi ehf., nam 55 milljónum króna á árinu 2002 eftir skatta. Teymi kom inn í rekstraruppgjör samstæðunnar frá og með 1. júlí 2002. Árið áður var tap Skýrr 128 milljónir.
Rekstrartekjur samstæðunnar á árinu 2002 námu alls 1.958 milljónum króna en 1.992 milljónum árið áður og lækka því um 1,7% milli ára. Meðal rekstrartekna á árinu 2002 er söluhagnaður að fjárhæð 3 milljónir, samanborið við 45 milljóna söluhagnað árið áður. Í tilkynningu félagsins er þess getið að á árinu 2001 hafi auk þess verið stór sala á Oracle viðskiptalausnum til ríkisins. Rekstrargjöld ársins, að meðtöldum afskriftum, námu 1.825 milljónum en 1.887 milljónum árið áður. Framlegð sem hlutfall af veltu hækkar úr 10,8% í 13,7% milli ára.
Í tilkynningunni segir að rekstur móðurfélagsins hafi gengið mjög vel í fyrra. Þannig hafi EBITDA numið 278 milljónum, eða 15,4% af veltu, en upphafleg rekstraráætlun gerði ráð fyrir 270 milljónum. Segir að þetta sé besta rekstrarár félagsins frá upphafi.
Hlutabréfaeign færð niður um 140 milljónir
Fjármagnsliðir ársins eru jákvæðir um 4 milljónir, en árið áður voru þeir neikvæðir um 42 milljónir. Segir í tilkynningunni að þar muni mest um 27 milljóna gengishagnað vegna styrkingar krónunnar. Sérstök niðurfærsla hlutabréfaeignar nemur samtals 140 milljónum á árinu, samanborið við 263 milljónir árið 2001. Um er að ræða bæði niðurfærslur vegna lækkunar á markaðsgengi skráðra hlutabréfa í eigu félagsins og jafnframt sérstakra niðurfærslna vegna eignarhluta í öðrum félögum. Þessi niðurfærsla skýrist að stærstum hluta af lækkun á bréfum í Columbus IT Partner A/S og Decode Genetics Inc., sérstakri niðurfærslu á hlutabréfum í Línu.Net hf. og auk þess er niðurfærsla á nokkrum eignarhlutum í öðrum fyrirtækjum, sem áður voru í eigu Teymis hf.