Besta leiðin í fjórum hjörtum suðurs fór framhjá mörgum keppendum Flugleiðamótsins, en spilið er frá fjórðu umferð á sunnudaginn:
Norður | |
♠962 | |
♥D43 | |
♦K62 | |
♣DG93 |
Suður | |
♠ÁKG5 | |
♥ÁK982 | |
♦1093 | |
♣10 |
Sagnir voru almennt á einföldum nótum: Suður vakti á einu hjarta, norður hækkaði í tvö og suður stökk í fjögur. Spaði var algengt útspil (fjarkinn, þriðja hæsta) upp á drottningu austurs og ás suðurs. Hvernig er best að spila?
Lykilatriðið er að sætta sig við þá forsendu að tígulásinn verði að liggja í vestur og reyna svo að tryggja það að vörnin fái ekki slag á spaða. Sigurbjörn Haraldsson spilaði nákvæmt. Hann lagði niður ÁK í hjarta (báðir með) og spilaði svo lauftíunni að heiman. Miðað við útspilið er líklegt að laufháspilin séu skipt eða bæði í austur.
Norður | |
♠962 | |
♥D43 | |
♦K62 | |
♣DG93 |
Vestur | Austur |
♠10842 | ♠D7 |
♥106 | ♥G75 |
♦ÁD5 | ♦G874 |
♣K872 | ♣Á654 |
Suður | |
♠ÁKG5 | |
♥ÁK982 | |
♦1093 | |
♣10 |
Austur tók á ásinn og spilaði spaða. Sigurbjörn drap, fór inn í borð á hjartadrottningu, spilaði laufi og henti tígli heima. Vestur fékk slaginn á laufkóng og annan á tígulás, en síðan ekki söguna meir. Einn spaði suður fór niður í frílauf.