NÝ kvikmynd eftir spænska verðlaunaleikstjórann Pedro Almodovar verður opnunarmynd kvikmyndahátíðarinnar í Cannes í ár.
Þar með verður La Mala Educacion, eða Léleg menntun, fyrsta spænska kvikmyndin sem opnar hátíðina sem er sú virtasta í heiminum.
Almodovar segir að þessi mikli heiður að fá að opna hátíðina kalli fram "ungæðislegar kenndir hjá sér".
Hann fékk leikstjóraverðlaun í Cannes fyrir Allt um móður mína 1999.
Framleiðsla Lélegrar menntunar er nú á lokastigi en hún segir frá sambandi tveggja pilta og prests við kaþólskan skóla á Spáni á 7. áratugnum og endurfundi þeirra áratugi síðar.
Ekki er komið á hreint hvort myndin verði í aðalkeppninni eftirsóttu á 57. kvikmyndahátíðinni í Cannes sem hefst 12. maí næstkomandi en nýlega var sagt frá að Quentin Tarantino verði formaður dómnefndar í keppninni.