RÁNFISKUR, sem Norðmenn kalla Kanadareyði eða Kanadableikju, er farinn að ógna vistkerfinu í norskum vötnum.
Norska náttúrufræðastofnunin, NINA, gerir hvað hún getur til að útrýma framandi fisktegundum í norskum vötnum og ám og þar er Kanadareyðurin efst á blaði. Var henni fyrst komið til í sænskum og finnskum vötnum og síðan hafa stangveiðimenn gerst sekir um að dreifa fiskinum viljandi til að hafa úr meiru að moða í veiðinni. Kom þetta fram á fréttavef Aftenposten í gær.
Fyrsta Kanadareyðurin veiddist í Kvesjøen í Norður-Þrændalögum fyrir tveimur árum og var hún meters löng og 10 kíló. Nú er hún komin í tvö vötn önnur og líklega fleiri.
Odd Terje Sandlund, sem vinnur við rannsóknir hjá NINA, segir, að Kanadareyðurin eyðileggi líffræðilega fjölbreytileika í þeim vötnum, sem hún kemst í, og sé auk þess miklu lakari matfiskur en urriði eða bleikja. Telur hann eins víst, að baráttan við hana sé þegar töpuð.
Til baka
Leita í greinasafni
Prenta grein
