MIKIÐ var. Mikið var að landinn tók við sér og fór að gefa þessu írska séníi nægan gaum. Og ekki seinna vænna því hann er á leiðinni til landsins, heldur tónleika á Nasa á föstudaginn kemur, tónleika sem hljóta að teljast með merkari tónlistarviðburðum ársins. Enda seldust miðar upp á einum degi.
Platan O, sem kemur nú í fyrsta sinn inn á topp 30 á Tónlistann, var að margra mati ein sú allra besta sem kom út á síðasta ári (kom reyndar fyrst út 2002 í heimalandinu) og það sem meira er, hún er með langlífari plötum, dvelur lengur í geislaspilaranum en flestar aðrar, slík er seiðmögnun Damien Rice.