VÍSINDAMENN eru nú nokkru nær um það en áður hvers vegna mörgum reynist erfitt að léttast.
Tveir hópar vísindamanna birta greinar í nýjasta hefti tímaritsins Science, þar sem sagt er frá rannsóknum á hormóninu leptíni, sem er framleitt af fitufrumum og stjórnar því hvort fólk upplifir sig hungrað eða mett. Svo virðist sem leptín gegni mikilvægu hlutverki við að koma á taugatengingum sem tengjast matarlyst, bæði strax á fósturskeiði og síðar á ævinni. Rannsóknirnar voru gerðar á músum, en vísindamennirnir telja að niðurstöður þeirra eigi einnig við um menn. Segja þeir þær varpa ljósi á það hvers vegna margir virðist fastir í sömu þyngd, þrátt fyrir lífstílsbreytingar og viðleitni til að léttast.
Jeffrey M. Friedman, sérfræðingur við Howard Hughes-rannsóknastofnunina við Rockefeller-háskóla í New York, uppgötvaði leptín fyrir tíu árum. Þegar fitufrumur losa hormónið inn í blóðrásina dregur það úr matarlyst og skortur á leptíni leiðir því til ofáts og offitu. Ekki hafa enn verið gerðar tilraunir með leptín á mönnum, og þar sem fyrrgreindar rannsóknir benda til þess að það hafi áhrif á byggingu heilans þegar á fósturskeiði er alls óvíst að vonir um að það geti gagnast sem töfralyf við offitu verði nokkurn tímann að veruleika.