Suður spilar þrjú grönd og sleppur óskaddaður frá hættuástandi í öðrum slag. Upp frá því snýst spilið um leit að laufdrottningunni.
Vestur gefur; NS á hættu.
Norður | |
♠3 | |
♥ÁG63 | |
♦63 | |
♣ÁG10752 |
Suður | |
♠D962 | |
♥D104 | |
♦KD9 | |
♣K64 |
Vestur | Norður | Austur | Suður |
Pass | 1 lauf | 1 tígull | 3 grönd |
Pass | Pass | Pass |
Vestur kemur út með tíuna í lit makkers og austur tekur með ás. Suður kærir sig ekki um spaða í öðrum slag og lætur því tíguldrottninguna detta undir ásinn! Það virkar, því austur spilar tígli áfram. Nían heldur og vestur fylgir lit. Hvernig á að vinna úr spilinu?
Vissulega mætti fara beint af augum í laufið, en það sakar ekki að leika einum millileik - spila hjartadrottningu. Ef vestur á kónginn væri hann vís með að leggja á, en annars er áætlunin sú að stinga upp ás og spila laufinu.
Vestur bítur á agnið og leggur hjartakónginn á drottninguna. Hjartanu er spilað áfram og það reynist liggja 3-3. Í síðasta hjartað hendir vestur spaða, en austur tígli.
Næst er laufi spilað á kóng og báðir fylgja með smáspili. Vestur hendir spaða í tígulkóng, og þegar laufi er spilað að blindum fylgir vestur smátt. Stóra stundin.
Á að stinga upp ás eða svína?
Norður | |
♠3 | |
♥ÁG63 | |
♦63 | |
♣ÁG10752 |
Vestur | Austur |
♠K10854 | ♠ÁG7 |
♥K95 | ♥872 |
♦104 | ♦ÁG8752 |
♣D83 | ♣9 |
Suður | |
♠D962 | |
♥D104 | |
♦KD9 | |
♣K64 |
Svíningin var "heit" strax í upphafi út frá tígulskiptingunni. Og nú er hún enn heitari, því vestur hefði vafalítið opnað á veikum tveimur í spaða með 6-3-2-2. Hann á því aðeins fimmlit í spaða og þar af leiðandi þrjú lauf.
E.s. Tíguldrottningin í fyrsta slag var mikilvæg, því ella hefði austur skipt yfir í spaðagosa með góðum árangri fyrir vörnina.