AÐDÁENDUR hinna fornfrægu þátta Húsið á Sléttunni ættu að kætast því í kvöld verður sýnd myndin Stúlkan á sléttunni en hún fjallar um afdrif hinnar hugljúfu Láru Ingalls úr þáttunum. Í Húsinu á sléttunni var sögð saga landnemanna Charles og Caroline Ingalls og dætra þeirra þriggja sem setjast að á sléttunum í vesturhluta Bandaríkjanna og heyja þar harða lífsbaráttu. Lára var ein aðalpersónan í þáttunum og var sagan oft sögð út frá sjónarhorni hennar.
Þættirnir voru sýndir í sjónvarpi í níu ár og voru geysivinsælir, m.a. hér á landi þar sem þeir héldu stórum hluta þjóðarinnar föngnum fyrir framan skjáinn á hverjum sunnudegi. Töffurum þótti þátturinn hins vegar helst til væminn og kölluðu hann Grenjað á gresjunni...
Stúlkan á sléttunni er á dagskrá Sjónvarpsins kl. 20.10. |