Hafnarfjörður - Fasteignasalan Höfði er nú með í sölu glæsilegt 320,7 ferm. einbýlishús við Víðivang 22 í Hafnarfirði. "Húsið stendur á bezta stað við hraunjaðarinn í Norðurbæ Hafnarfjarðar," segir Guðmundur Karlsson hjá Höfða í Hafnarfirði.
Bílskúrinn er tvöfaldur með góðu geymslulofti. Svalir og verönd eru meðfram allri efri hæðinni og mikil lofthæð á efri hæðinni gerir öll rými opin og björt.
Í kjallara er í dag góð 2ja herb. íbúð en lítið mál væri að opna aftur á milli. Stórkostlegt útsýni er til sjávar og sveita, en engin byggð er fyrir aftan húsið. Lóðin er blanda af hraunlóð, grasi og sólarverönd. Innréttingar eru úr aski og sama áferð á öllu tréverki.
Við efri hæð, sem er götuhæð, er bílaplan með hitalögn og þar er tvöfaldur um 60 ferm. bílskúr með mikilli lofthæð, háum hurðum og einangruðu hillulögðu geymslulofti. Á efri hæð er ennfremur anddyri með skáp, gestasalerni, stofa, borðstofa, arinn og sjónvarpsrými, eldhús, búr, þvottahús, hjónaherbergi með góðum skápum, baðherbergi og tvö barnaherbergi. Parket er á gólfum, en flísar í forstofu, eldhúsi, baði og þvottahúsi.
Á neðri hæð er sérinngangur, anddyri með skáp, sjónvarpsrými, eldhús, stofa, herbergi, mjög rúmgott baðherbergi, þar sem gert er ráð fyrir gufu, stórt rými, sem má skipta í tvennt, stór geymsla og leikhorn er við stigann upp á efri hæð.
Húsið hefur alltaf verið í eigu sömu eigenda og fengið mjög gott viðhald.
"Mikil framsýni og nákvæmni í hönnun sem og klassískt yfirbragð gerir þetta hús að einstöku húsi á einstökum stað, en arkitekt að húsinu var Óli G. H. Þórðarson og innanhússarkitekt Lovísa Christiansen," sagði Guðmundur Karlsson að lokum. Óskað er eftir tilboðum í húsið.