RANNSÓKNARLÖGREGLA í Belgíu og Frakklandi vonast til að játningar Frakkans Michels Fourniret, sem hefur verið í haldi í Belgíu frá því í fyrra eftir misheppnað brottnám 13 ára stúlku, verði til þess að fleiri mannshvörf upplýsist.
Fourniret, sem er 62 ára og hefur búið í Belgíu síðustu ár, hefur frá því í síðustu viku játað á sig alls níu morð - á átta stúlkum og einum karlmanni - sem framin voru á tímabilinu 1987 til 2001. Á laugardag vísaði hann rannsakendum á hvar lík tveggja stúlkna, sem saknað hafði verið í Frakklandi frá því árið 1989, voru grafin, í garði við norður-franskt sveitasetur þar sem hann bjó áður.
Fourniret er nú kallaður "franski Dutroux" í belgískum fjölmiðlum, eftir belgíska barnaníðingnum Marc Dutroux sem var dæmdur í lífstíðarfangelsi fyrir sína níðingsglæpi gegn ungum stúlkum fyrir skemmstu.
Eiginkona Fournirets, Monique, er einnig í gæzluvarðhaldi, sökuð um þátt í mannránum, en hún sakar mann sinn um að hafa að minnsta kosti 10 morð á samvizkunni.
Saksóknari sem unnið hefur að málinu sagði í gær að vísbendingar væru um að Fourniret hefði framið fleiri glæpi.
Í dönskum fjölmiðlum var greint frá því í gær að danska lögreglan væri að kanna hvort verið gæti að það hefði verið Fourniret sem nauðgaði og reyndi að drepa 11 ára danska stúlku árið 1999.
Namur, Kaupmannahöfn. AFP.
Til baka
Leita í greinasafni
Prenta grein
