MARTIN Beck Andersen, knattspyrnumaður frá Danmörku, hefur tekið boði Framara um að leika með þeim út þetta keppnistímabil. Hann er væntanlegur til landsins á morgun eða miðvikudag og ætti því að geta leikið með Fram þegar liðið sækir Keflvíkinga heim í úrvalsdeildinni á fimmtudagskvöldið. Martin Beck er tvítugur og getur leikið flestar stöður á vellinum en hann lék sex leiki með AGF í dönsku úrvalsdeildinni síðasta vetur.
Ólafur H. Kristjánsson, nýráðinn þjálfari Fram, getur ekki stýrt liðinu í fyrstu tveimur leikjunum, gegn Keflavík í bikarnum í kvöld og í deildinni á fimmtudag. Hann fór til Danmerkur í gær til að gangast undir þjálfarapróf UEFA.